Ազգային անվտանգության հարցերով ԱՄՆ նախագահի նախկին խորհրդական Ջոն Բոլթոնին «անհանգստացրել» է, «միջուկային արմագեդոնի» վերաբերյալ նախագահ Ջո Բայդենի վերջին մեկնաբանությունները ։
«Կարծում եմ, որ ամեն անգամ, երբ մենք մտածում ենք միջուկային զենքի հնարավոր կիրառման մասին, պետք է լրջորեն վերաբերվենք դրան եւ շատ սթափ», - ասել է Բոլթոնը CBS News-ին:
«Իմ կարծիքով, նախագահն իր մեկնաբանությամբ չափազանցել է այն իրավիճակի լրջությունը, որում մենք գտնվում ենք հիմա», - ասել է Բոլթոնը՝ անդրադառնալով հինգշաբթի օրը արված Բայդենի այն մեկնաբանությանը, որ Քենեդիների եւ Կուբայի հրթիռային ճգնաժամից հետո արմագեդոնի չեն բախվել: Նախագահը բացատրել է, որ միջուկային զեք կիրառումն առանց արմագեդոնի անհնար է:
«Ես հատկապես անհանգստացա, երբ նա ասաց. «Գիտեք, ես չեմ կարող պատկերացնել մարտավարական միջուկային զենքի օգտագործումը, որը չի հանգեցնի Արմագեդոնի»: Սա պատճառահետեւանքային կապն է՝ մարտավարական միջուկային զենքի կիրառման, որով ներկայումս սպառնում է Վլադիմիր Պուտինը», - նշել է Բոլթոնը:
«Պուտինը կցանկանար, որ մենք մտածենք, որ դա անխուսափելի է եւ, որ մարդիկ նյարդայնանան։ Այստեղ միջուկային զենք կիրառելու վտանգ կա։ Սակայն չեմ կարծում, որ առկա են այն հանգամանքները, որ դա տեղի ունենա», - ասել է նախկին խորհրդականը եւ հավելել, որ Արեւմուտքի համար շատ կարեւոր է հետ չմնալը:
