ԱՄՆ պետքարտուղար Էնթոնի Բլինքենը ողջունել է Ադրբեջանի հետ Հայաստանի սահմանի երկայնքով ԵՄ քաղաքացիական առաքելություն տեղակայելու ծրագրերը՝ վստահությունն ամրապնդելու համար։ Այս մասին ասվում է Բլինքենի եւ Հայաստանի վարչապետ Նիկոլ Փաշինյանի հեռախոսազրույցի արդյունքներով Պետդեպարտամենտի հաղորդագրության մեջ։
«Բլինքենը երախտագիտություն է հայտնել Հայաստանի եւ Ադրբեջանի կողմից նախաձեռնվող դրական քայլերի համար՝ կայուն խաղաղության համաձայնագրի հասնելու համար, ներառյալ արտաքին գործերի նախարարների եւ ղեկավարների միջեւ ուղիղ բանակցությունները:
Պետքարտուղարը վարչապետ Փաշինյանին կոչ է արել շարունակել աշխատանքը Ադրբեջանի հետ՝ նախանշված խաղաղ գործընթացին աջակցելու քայլերի ուղղությամբ՝ հաստատված ժամանակացույցին համապատասխան։
Նա հաստատել է ԱՄՆ աջակցությունը, այդ թվում՝ սահմանների հստակ սահմանազատման, տրանսպորտային կապերի, անհետ կորածների որոնման եւ նույնականացման, կալանավորների վերադարձի եւ այլ հարցերի առնչությամբ:
Նա նաեւ ընդգծել է Լեռնային Ղարաբաղի բնակիչների իրավունքների եւ երաշխիքների քննարկման կարեւորությունը, ինչպես նաեւ այն բանի անհրաժեշտությունը, որ երկու կողմերն աջակցեն հրադադարին եւ կենտրոնանան բանակցային ճանապարհով ձեռք բերված համաձայնագրի վրա՝ որպես ամուր խաղաղության միակ ճանապարհ, ասվում է հաղորդագրության մեջ։
Իր Twitter-ում Բլինքենը նշել է, որ Փաշինյանի հետ զրույցի ընթացքում ինքը«ողջունել է Ադրբեջանի եւ Հայաստանի միջեւ խաղաղության պաշտոնական բանակցություններում առաջընթացը»։ «Բանակցությունների միջոցով կնքված համաձայնագիրը ամուր խաղաղության միակ ճանապարհն է»,- նշել է նա։
