Իրանը ցանկանում է Հայաստանը կայուն տեսնել։ Մենք Հայաստանում խաղաղության դեսպանորդներն ենք։ Հոկտեմբերի 21-ին Կապանում լրագրողների հետ զրույցում այս մասին ասաց Իրանի գլխավոր հյուպատոս Աբեդին Վարամինը։
Մասնավորապես, գլխավոր հյուպատոսը հիշեցրեց, որ Իրանի բարձրաստիճան պաշտոնատար անձինք բազմիցս եւ բավականին հստակ հայտարարել են այն մասին, որ պետք է հարգել միջազգայնորեն ճանաչված սահմանները, ինչպես նաեւ երկրների տարածքային ամբողջականությունը։
Վարամինը ուշադրություն հրավիրեց Իրանի արտգործնախարար Հոսեյն Ամիր Աբդոլլահիանի խոսքերին այն մասին, որ Հայաստանի անվտանգությունն Իրանի անվտանգությունն է։
«Մենք շատ հստակ ասում ենք, որ պաշտոնապես չենք ճանաչում սահմանների որեւէ փոփոխություն։ Մենք ցանկանում ենք խաղաղ եւ կայուն Հայաստան»,- ասաց դիվանագետը։
Նա նշեց, որ հաշվի են առնվելու երկու երկրների շահերը եւ Կապանի բնակիչներին կոչ արեց չանհանգստանալ։
«Ես Կապանի բնակիչներին խորհուրդ կտամ չանհանգստանալ։ Մենք այստեղ ենք հայ ժողովրդի համար։ Ես ինքս այստեղ եմ»,- շեշտեց գլխավոր հյուպատոսը։
Վարամինը հավելեց, որ Իրանի գլխավոր հյուպատոսության բացումը ցույց է տալիս երկու երկրների ղեկավարների հաստատակամ վճռականությունը՝ շարունակելու երկկողմ համագործակցության զարգացումը։