ՆԱՏՕ-ի գլխավոր քարտուղար Յենս Սթոլթենբերգը հայտարարել է մոտ ժամանակներս Թուրքիա այցելելու մտադրության մասին, որպեսզի քննարկի դաշինքին միանալու Շվեդիայի եւ Ֆինլանդիայի հայտերը։
Հունգարիան եւ Թուրքիան ՆԱՏՕ-ի միակ երկրներն են, որոնք դեռ չեն վավերացրել երկու երկրների հայտերը։
«Ես ողջունում եմ հուշագրի իրականացման շուրջ Ֆինլանդիայի, Շվեդիայի եւ Թուրքիայի համատեղ աշխատանքը, որը նրանք համաձայնեցրել են Մադրիդի գագաթաժողովի շրջանակներում՝ միջազգային ահաբեկչության դեմ պայքարում ջանքերն ակտիվացնելու համար։ Շվեդիան հասկացրել է, որ Թուրքիա զենքի արտահանման սահմանափակումներ չկան... Ուստի վստահ եմ, որ բոլոր դաշնակիցները կվավերացնեն անդամակցության արձանագրությունը։ Ես ողջունում եմ նաեւ այն փաստը, որ Ֆինլանդիան եւ Շվեդիան սերտ կապի մեջ են Թուրքիայի հետ։ Վերջերս այստեղ էր Շվեդիայի վարչապետը։ Մենք, իհարկե, քննարկեցինք անդամակցության գործընթացը, եւ նա կմեկնի Թուրքիա՝ հանդիպելու նախագահ Էրդողանի հետ։
Ես էլ կմեկնեմ Անկարա... Կամ Թուրքիա, Ստամբուլ, որ մոտ ապագայում անձամբ հանդիպեմ նախագահ Էրդողանի հետ։ Այսպիսով, մենք սերտ կապի մեջ ենք Ֆինլանդիայի եւ Շվեդիայի հետ, եւ, իհարկե, բոլոր մակարդակներում սերտ կապի մեջ ենք մեր մերձավոր դաշնակցի՝ Թուրքիայի հետ»,- նշել է Սթոլթենբերգը։
