Շվեդ էկոակտիվիստուհի Գրետա Թունբերգը ՄԱԿ-ի Կլիմայի փոփոխության COP27 համաժողովը բնության մասին կեղծ հոգածության, ստի եւ խարդախության վայր է անվանել: Շրջակա միջավայրի պաշտպանն ինքը հրաժարվել է մասնակցել գագաթաժողովին, հայտնում է Reuters-ը։
Թունբերգը նաեւ նշել է, որ Եգիպտոսի իշխանությունները ճնշում են խոսքի ազատությունը եւ խախտում մարդու մյուս իրավունքները։ «Քաղաքացիական հասարակության համար տարածքը չափազանց սահմանափակ կլինի։ Ակտիվիստների համար դժվար կլինի հասնել իրենց ձայնը լսելի դարձնելու իրավունքին»,- ասել է բնապահպանը։
Բանն այն է, որ Եգիպտոսի իշխանությունները փաստացի արգելել են երկրի տարածքում հանրային ցույցերը, իսկ էկոակտիվիստների համար հավատարմագրերի եւ անցագրերի տրամադրման սահմանափակումներ եղել են նաեւ ՄԱԿ-ի կլիմայական նախկին կոնֆերանսների ժամանակ:
Բացի այդ, Թունբերգը մեկնաբանել է բրիտանական Just Stop Oil իրավապաշտպան շարժման անդամների վերջին բողոքի ակցիաները, որոնք Լոնդոնի ազգային պատկերասրահում ապուր են լցրել Վինսենթ վան Գոգի «Արեւածաղիկներ» կտավի վրա: Ակտիվիստը նշել է, որ մոլորակի ճակատագրով մտահոգված մարդիկ ստիպված են բողոքի նոր մեթոդներ փնտրել, քանի որ տեսնում են, որ մյուս միջոցներն արդեն չեն գործում։