Ուկրաինայի, Թուրքիայի եւ ՄԱԿ-ի պատվիրակությունները ժամանակավորապես դադարեցրել են նավերի տեղաշարժը սեւծովյան հացահատիկային համաձայնագրի շրջանակում։ Այս մասին հայտարարել է միացյալ համակարգող կենտրոնում ՄԱԿ-ի քարտուղարությունը։
Նշվում է, որ Թուրքիայի եւ ՄԱԿ-ի տեսուչները նոյեմբերի 1-ին ավարտել են 36 ստուգումներ մեկնող նավերում՝ նախաձեռնությանը Ռուսաստանի մասնակցության կասեցումից օրեր անց։
ՄԱԿ-ի գլխավոր քարտուղարի պաշտոնական ներկայացուցիչ Ֆարհան Հակը պարզաբանել է, որ այդ միջոցը ժամանակավոր է։ Նրա խոսքով՝ նավերի տեղաշարժը դադարեցնելու մասին որոշում է կայացվել միայն մեկ օրով։
Ավելի վաղ Ռուսաստանը անորոշ ժամկետով կասեցրել է իր մասնակցությունը գործարքին։ Մոսկվան հայտնել է, որ հոկտեմբերի 29-ին Ուկրաինայի զինված ուժերը՝ հացահատիկի արտահանման համար ստեղծված մարդասիրական միջանցքի քողի ներքո, զանգվածային հարվածներ են հասցրել Սեւաստոպոլում գտնվող նավերի եւ Սեւծովյան նավատորմի ենթակառուցվածքների ուղղությամբ։
