Քեմբրիջի համալսարանի կենսաբանների խումբը պարզել է, որ վերջին տասնամյակների ընթացքում ռնգեղջյուրների եղջյուրները զգալիորեն փոքրացել են: Հետազոտողները դա կապում են որսագողերի գործունեության հետ, հայտնում է Gazeta-ն՝ վկայակոչելով People and Nature ամսագիրը։
Գիտնականները նման եզրակացության են եկել՝ վերլուծելով 1886-2018 թվականներին արված սպիտակ, սեւ, հնդկական, ճավայական եւ սումատրական ռնգեղջյուրների լուսանկարները: Եղջյուրների չափը որոշելու համար գիտնականները չափել են կենդանիների մարմնի եւ գլխի երկարությունը: Պարզվել է, որ եղջյուրների երկարությունը վերջին 100 տարվա ընթացքում աստիճանաբար նվազել է ռնգեղջյուրների բոլոր տեսակների մոտ։
Այս միտումի համար մեղավոր են որսագողերը, որոնք որսում են խոշոր եղջյուրներով կենդանիներին։ Դրա պատճառով ավելի փոքր եղջյուրներով կենդանիները ցեղը շարունակելու եւ գեներն իրենց ժառանգներին փոխանցելու ավելի շատ հնարավորություններ են ունեցել: Սակայն, ըստ գիտնականների, դա կարող է բացասաբար ազդել կենդանիների վրա, քանի որ մեծ եղջյուրներն օգնում են ռնգեղջյուրներին ավելի արդյունավետ կերպով սնունդ փնտրել եւ պաշտպանվել գիշատիչներից:
