Հազարավոր ձեռնարկություններ չեն կարողանա կատարել կլիմայի փոփոխության վերաբերյալ իրենց խոստումները, եթե չսկսեն աշխատակիցներին ուսուցանել կայուն զարգացման սկզբունքները, Reuters-ին ասել է Microsoft կորպորացիայի նախագահ Բրեդ Սմիթը:

Նրա խոսքով՝ ընդհանուր ուղեցույցը այնպիսի հարցերի վերաբերյալ, ինչպիսին է ածխածնի արտանետումների հաշվառումը, չափազանց հատվածական է եղել մոտավորապես 3900 ընկերությունների համար, որոնք խոստացել են կրճատել CO2-ի արտանետումները:

«Մենք պետք է շատ արագ գործենք, որպեսզի սկսենք նվազեցնել մեր արտանետումները, եւ մեր խնդիրը որակյալ կադրերի բացակայությունն է»,- ասել է նա։

Microsoft-ը ծրագրային ապահովում է վաճառում կազմակերպություններին՝ շրջակա միջավայրի վրա նրանց ազդեցությանը հետեւելու համար: Այնուամենայնիվ, գլոբալ տաքացման դեմ պայքարելու համար ընկերություններին ավելին է պետք, քան տեխնոլոգիաները, ասել է Սմիթը` հայտարարելով բնապահպանական կրթական նյութեր մշակելու պլանների մասին, այդ թվում՝ Microsoft-ին պատկանող LinkedIn-ում:

Սմիթի խոսքով՝ թեեւ Microsoft-ն ինքն է մեծացրել կայուն զարգացման ոլորտում իր աշխատողների թիվը՝ հասցնելով մինչեւ 250-ի` հիմնականում 30-ից վերջին երեք տարիների ընթացքում, ածխածնի նվազեցման նպատակներին հասնելու համար համապատասխան աշխատուժ ունենալը խնդիր է մնում։