Նիկոլ Փաշինյանի կողմից Բելառուսի նախագահ Ալեքսանդր Լուկաշենկոյին արձագանք եղել է, բայց ճիշտ չի լինի, որ դրա տեսագրությունը հանրությանը ներկայացվի։ Այս մասին այսօր՝ նոյեմբերի 2-ին, Ազգային ժողովում լրագրողների հետ զրույցում ասաց ԱԺ նախագահ Ալեն Սիմոնյանը։
«Լուկաշենկոյի արտահայտություններում ես լրջություն չտեսա։ Մտավախություն ունեմ, որ արտահայտած մտքերն այդքան էլ իրենը չէին։ Նիկոլ Փաշինյանի Լուկաշենկոյին արձագանք եղել է, բայց ճիշտ չի լինի, որ դրա տեսագրությունը հանրությանը ներկայացվի։ Ես ակնկալում եմ, որ նոյեմբերի 23-ին Երեւանում անցկացվելիք ՀԱՊԿ Հավաքական անվտանգության խորհրդի նիստին Լուկաշենկոն ելույթ կունենա։ Սպասում եմ դրան»,- ասաց Սիմոնյանը։
Ալեն Սիմոնյանի խոսքով՝ Երեւանը դեռեւս չի ստացել Ռուսաստանի ԱԳՆ-ի կողմից դիմում, որով պահանջվում է պարզաբանում Մարգարիտա Սիմոնյանին Հայաստանում անցանկալի անձ ճանաչելու վերաբերյալ։
«Եթե դիմում լինի, համարժեք պատասխանը կլինի, եւ կարծում եմ, որ այդ որոշումը շատ տեղին է, ինչ-որ՝ տեղ ուշացած։ Էլի մարդիկ կան, որոնք Հայաստանի շահերը ոտնահարելով, պետք է գիտակցեն, որ այստեղ անցանկալի անձ են։ Պետք չէ տանել այն ուղղությամբ, որ Ռուսաստանը մեզ համար անցանկալի է, նման բան գոյություն չունի։ Մենք Ռուսաստանից ակնկալում եւ սպասում ենք իրենց պայմանագրով եւ ղեկավարի կողմից արված հայտարարություններով իրական քայլերի։ Երբ ես շփվում եմ ռուս պաշտոնյանների հետ, շատ հանգիստ ասում եմ, որ Հայաստանում այսօրվա իշխանությունը ամենառուսամետներից է, եւ իրենք դրան համաձայնում են»,- նշեց Ալեն Սիմոնյանը։
