Զգուշավոր լավատեսություն կա Հունգարիայի հետ դիվանագիտական հարաբերությունները վերականգնելու հարցում։ Այս մասին այսօր՝ նոյեմբերի 3-ին, ԱԺ մշտական հանձնաժողովների համատեղ նիստում 2023 թվականի պետբյուջեի նախագծի քննարկման ժամանակ ասաց ՀՀ փոխարտգործնախարար Պարույր Հովհաննիսյանը։
Փոխնախարարի խոսքով՝ Հայաստանի ԱԳՆ-ն տեսնում է, որ Հունգարիայի կողմից որոշակի քայլեր են ձեռնարկվում այս ուղղությամբ։ «Եվ, իհարկե, մենք պատրաստ ենք համապատասխան լուծում տալ այս իրավիճակին։ Լրացուցիչ քայլեր են անհրաժեշտ»,-ասաց Հովհաննիսյանը։
Դիվանագետը նշեց, որ Ադրբեջանը Հունգարիայի միջնորդությամբ հայկական կողմին է հանձնել հինգ գերեվարված զինվորի։ Նրա խոսքով՝ Հունգարիան ֆինանսական աջակցություն է ցուցաբերել Հայաստանին կորոնավիրուսի դեմ պայքարում։
Նա հիշեցրեց, որ վերջերս նաեւ Բուդապեշտում բացվել է հայկական կաթոլիկ վերանորոգված եկեղեցի, ներկա է եղել նաեւ Հայ Կաթոլիկ եկեղեցու պատրիարքը, որը հանդիպում է ունեցել Հունգարիայի նախագահի հետ:
Հիշեցնենք, որ Հայաստանը խզել է դիվանագիտական հարաբերությունները Հունգարիայի հետ այն բանից հետո, երբ Բուդապեշտը Բաքվին է հանձնել ադրբեջանցի զինծառայող Ռամիլ Սաֆարովին, որը 2004 թվականին քնած ժամանակ կացնահարել է հայ սպա Գուրգեն Մարգարյանին։ Սաֆարովը դատապարտվել էր ցմահ ազատազրկման, 30 տարվա ընթացքում առանց ներման թույլտվության։