ՆԱՏՕ-ն աջակցում է Հայաստանի եւ Ադրբեջանի հարաբերությունների կարգավորմանը եւ ողջունում է ԵՄ-ի ջանքերն այս ուղղությամբ։ Այս մասին Twitter-ում գրել է Կովկասում եւ Կենտրոնական Ասիայում ՆԱՏՕ-ի հատուկ ներկայացուցիչ Խավիեր Կոլոմինան։ «Լավ նորությունն այն է, որ մեր գործընկերները քննարկում են սահմանների սահմանազատումը, որն անհրաժեշտ է տեղում անվտանգությունը բարելավելու համար: ՆԱՏՕ-ն աջակցում է Հայաստանի եւ Ադրբեջանի միջեւ հարաբերությունների կարգավորմանը եւ ողջունում է ԵՄ-ի ջանքերն այս ուղղությամբ, ներառյալ այդ բանակցությունների անցկացումը եւ ԵՄ դիտորդական առաքելության մեկնարկը»,- նշել է նա։
Նշենք, որ այսօր Բրյուսելում կայացել է սահմանի սահմանազատման հարցով Հայաստանի եւ Ադրբեջանի սահմանային հանձնաժողովների երրորդ նիստը։ Ինչպես հանդիպման արդյունքներով հայտնել է Հայաստանի ԱԳՆ-ը, «hանձնաժողովների համատեղ գործունեության իրավական շրջանակների ձեւավորման նպատակով՝ կողմերը պայմանավորվել են արագացնել Հայաստանի Հանրապետության եւ Ադրբեջանի Հանրապետության միջեւ պետական սահմանի սահմանազատման ու սահմանային անվտանգության հարցերով հանձնաժողովի եւ Ադրբեջանի Հանրապետության ու Հայաստանի Հանրապետության միջեւ պետական սահմանի սահմանազատման պետական հանձնաժողովի համատեղ գործունեության կարգի համաձայնեցման աշխատանքները»: