Դուշանբեում Սահմանապահ զորքերի հրամանատարների խորհուրդը քննարկել է ԱՊՀ արտաքին սահմաններին տիրող իրավիճակը, հաղորդում է «ՌԻԱ Նովոստին»՝ հղում անելով Տաջիկստանի սահմանապահ զորքերի գլխավոր վարչության մամուլի ծառայությանը։
«Խորհրդի հետագա աշխատանքի շրջանակում վերլուծվել է ԱՊՀ մասնակից պետությունների արտաքին սահմաններին տիրող իրավիճակը եւ դրա զարգացման միտումները, քննարկվել են հյուսիսարեւմտյան, արեւմտյան եւ կենտրոնասիական ուղղություններում ԱՊՀ արտաքին սահմանների միջով հակաիրավական գործունեության կանխման հարցով հատուկ սահմանային օպերացիաների անցկացման արդյունքները, ինչպես նաեւ 2023 թվականին դրանց անցկացման հետ կապված հարցերը»,-ասվում է հաղորդագրության մեջ։
Նիստի ժամանակ նշվել է, որ ժամանակակից մարտահրավերներին եւ սպառնալիքներին հակազդեցությունը պահանջում է բոլոր ոլորտներում ջանքերի կենտրոնացում եւ ավելացում։
Մասնակիցները քննարկել են նաեւ 2021-2025 թվականներին արտաքին սահմաններին սահմանային անվտանգության ամրապնդմանն ուղղված ծրագրի իրականացման ընթացքը եւ անդրսահմանային հանցագործության դեմ պայքարի միջպետական ծրագրի դրույթների իրականացումը, անդրադարձել են նաեւ ԱՊՀ սահմանային գերատեսչությունների տեղեկատվական համագործակցության կատարելագործմանն առնչվող հարցերը, գիտահետազոտական եւ կրթական գործունեությունը, կադրերի պատրաստումը։