Գեղարքունիքի մարզի Աստղաձոր համայնքում շահագործման է հանձնվել երկու խոշորագույն արևային ֆոտովոլտային կայան, որոնք կառուցվել են Բիբլոս Բանկ Արմենիայի աջակցությամբ։
Նախագծի իրագործման համար Բանկը 5,5 մլն ԱՄՆ դոլարի ֆինանսավորում է տրամադրել AS Energy և PromSun ընկերություններին, ինչը կազմում է ընդհանուր նախագծի արժեքի 80%-ը:
«Սա Բիբլոս Բանկի ֆինանսավորմամբ՝ Հայաստանում արևային էլեկտրակայանների կառուցման առաջին նախագիծն է։ Այսօր արդեն կարող ենք փաստել, որ այս մեծամասշտաբ ու կարևոր նախագիծն իրականացվել է հաջողությամբ»,- նշել է Բանկի Առևտրային գործառնությունների վարչության պետ Վահան Կաջայանը՝ հավելելով, որ կայուն էներգետիկայի զարգացման, վերականգնվող էներգետիկ համակարգերի ներդրման և էներգախնայողությանն ուղղված նախագծերը շարունակելու են մնալ Բիբլոս Բանկ Արմենիայի ուշադրության կենտրոնում։
«Արևային էներգետիկայում «Ա-Ս Էներջի» և «ՊրոմՍինթեզ» կայանները հանդիսանում են վերջին տեխնոլոգիաների և ինժեներական լուծումների իդեալական համադրություն: Նման ծրագրերը որպես շարժիչ ուժ են ծառայում ՀՀ մարզերի կայուն զարգացման համար։ Բացի արևային ներուժից, Հայաստանի Հանրապետության որոշ մարզեր ունեն նաև քամու էներգիայի մեծ ներուժ: Հուսով ենք, որ վերականգնվող էներգիայի ծրագրերը շարունակական բնույթ կկրեն, և երկրի էներգետիկ բալանսում դրանց չափաբաժինը գնալով կմեծանա»,- ասել է Օպտիմում Գրուպի զարգացման բաժնի ղեկավար Հովհաննես Թևոսյանը:
10 ՄՎտ ընդհանուր դրվածքային հզորությամբ և 20 մլն կՎտժ-ից ավելի տարեկան արտադրությամբ «Ա-Ս Էներջի» և «Պրոմսինթեզ» արևային կայանների կառուցման աշխատանքներն իրականացրել է Օպտիմում Էներջի ՍՊԸ-ն։
«Պրոմսինթեզ» արևային կայանը Գեղարքունիքի մարզի առաջին կայանն է, որը կառուցվել է արհեստական բանականությամբ և արևին հետևող համակարգով, ինչը մաքսիմալ մեծացնում է կայանի արտադրողականությունը՝ ավելացնելով այն ավելի քան 18%-ով։
Վերականգնվող էներգիայի արտադրությունը դրական ազդեցություն կթողնի շրջակա միջավայրի վրա։ Ֆոտովոլտային կայանները կնվազեցնեն ածխաթթու գազի տարեկան արտանետումը 4,350 տոննայով, իսկ մեկ ժամում արտադրված էներգիան թույլ կտա սնուցել մոտ 70 փոքր գյուղ:
Ծրագիրը կարևոր ներդրում ունի նաև համայնքների զարգացման գործում։ Ինչպես շինարարության ընթացքում, այնպես էլ շահագործման փուլում Աստղաձոր համայնքում ստեղծվել և ստեղծվում են նոր աշխատատեղեր։
