Արեւմտյան երկրները պետք է զգույշ լինեն, որպեսզի նոր կախվածություն չստեղծեն Չինաստանից, նախազգուշացրել է ՆԱՏՕ-ի գլխավոր քարտուղար Յենս Սթոլտթենբերգը, հայտնում է Reuters-ը։
«Մենք տեսնում ենք մեր կարեւոր ենթակառուցվածքները, մատակարարումների շղթաները եւ հիմնական արդյունաբերական հատվածները վերահսկելու Չինաստանի աճող ջանքերը»,- ասել է նա Իսպանիա կատարած այցի ժամանակ: Սթոլթենբերգը դաշնակիցներին կոչ է արել ամրապնդել իրենց հասարակություններն ու ենթակառուցվածքները։
«Չինական հազվագյուտ հողային օգտակար հանածոներ կան ամենուր, ներառյալ՝ մեր հեռախոսներում, ավտոմեքենաներում եւ ռազմական տեխնիկայում,- ասել է նա,- Մենք չենք կարող ավտորիտար ռեժիմներին մեր խոցելիությունը օգտագործելու եւ մեզ խարխլելու հնարավորություն տալ»:
Իր նոր ռազմավարական հայեցակարգում, որը համաձայնեցվել է հունիսին, ՆԱՏՕ-ն Չինաստանը բնութագրել է որպես մարտահրավեր՝ դաշինքի «շահերին, անվտանգությանն ու արժեքներին», եւ որպես տնտեսական ու ռազմական տերություն, որը մնում է «անթափանց իր ռազմավարության, մտադրությունների ու ռազմական հզորացման հարցում»:
Փաստաթուղթն արտացոլում է պարադիգմայի փոփոխություն: ՆԱՏՕ-ի նախորդ՝ 2010 թվականի ռազմավարության մեջ Պեկինը, որն այն ժամանակ դիտվում էր հիմնականում որպես ցանկալի առեւտրային գործընկեր եւ արտադրական բազա Արեւմուտքում, նույնիսկ չէր նշվում:
