Եվրամիության էներգետիկայի նախարարները հինգշաբթի օրը կհանդիպեն Բրյուսելում, որպեսզի հաստատեն էներգետիկ ճգնաժամի հետեւանքները մեղմելու վերջին արտակարգ միջոցառումները, սակայն պլանները կարող են խափանվել այն տարաձայնությունների պատճառով, թե արժե արդյոք սահմանափակել գազի գները, հաղորդում է Reuters-ը:
Սեղանին նոր օրինագծեր են՝ վերականգնվող էներգիայի աղբյուրների լիցենզավորման ընթացակարգերը արագացնելու եւ ԵՄ 27 երկրների համար գազի համատեղ գնումներ սկսելու համար:
Լեհաստանը, Բելգիան, Իտալիան եւ Հունաստանը սպառնացել են արգելափակել դրանք, եթե փաթեթը չպարունակի նաեւ գազի գնի սահմանափակում: Սակայն Գերմանիայի գլխավորած փոքր, բայց ազդեցիկ ճամբարը դեմ է սահմանափակմանը՝ ասելով, որ դա կխրախուսի մատակարարներին գազ վաճառել այլ բաժանորդներին:
Եվրոպական էներգակիրների բորսաների Europex ասոցիացիան նրանց թվում է, որոնք քննադատել են նման միջամտության ծրագրերը:
Քանի որ ամբողջ մայրցամաքում ջերմաստիճանը նվազում է ձմռան նախաշեմին, նախարարները ստիպված կլինեն վերանայել այն հարցը, որը ամիսներ շարունակ պառակտում է ԵՄ-ին:
Եվրահանձնաժողովը մինչ այժմ առաջարկել է սահմանափակում կիրառել Նիդեռլանդներում բազավորված Title Transfer Facility (TTF) բորսայում, որը ծառայում է որպես գնային հենանիշ Եվրոպայում:
Հանձնաժողովի կարծիքով, երկրորդ պայմանը Եվրոպա ՀԲԳ մատակարարումների ներգրավման շարունակական բանալին է:
Էներգետիկ կարգավորիչների հետ համագործակցության ԵՄ գործակալությունը (ACER) ամեն օր կվերահսկի շուկաները, եւ եթե գների աճ լինի, որը տարբերվում է համաշխարհային շուկաներից, նույն օրը կտեղեկացնի ԵՄ գործադիր մարմիններին, եւ սահմանափակումն ինքնաբերաբար ուժի մեջ կմտնի։
Հանձնաժողովն իրավունք կունենա անհապաղ կասեցնել սահմանափակումը, եթե դա հանգեցնի դաշինքի համար չնախատեսված բացասական հետեւանքների, այդ թվում՝ մատակարարման անվտանգության առումով։ Հակառակ դեպքում Հանձնաժողովը կդադարեցնի մեխանիզմը, եթե այն կատարի իր առաջադրանքը։
Հանձնաժողովը հայտարարել է, որ սահմանափակումը կլինի «ծայրահեղ միջոց», որը հիմնականում նախատեսված է զսպելու համար: Թե որքան ժամանակ այն հասանելի կլինի, դեռ չի հայտարարվել։ Ասվում է, որ առաջարկվող շուկայական միջամտությունը ուղղակի ազդեցություն չունի գոյություն ունեցող երկարաժամկետ պայմանագրերի վրա:
