Ռուսաստանը, Իրանը եւ Թուրքիան դատապարտել են Սիրիայում Իսրայելի շարունակվող ռազմական հարձակումները։ Այս մասին ասվում է Աստանայի ձեւաչափով Սիրիայի հարցով 19-րդ միջազգային հանդիպման արդյունքներով երեք երկրների համատեղ հայտարարության մեջ, հաղորդում է ՏԱՍՍ-ը։
Նշվում է, որ Աստանայի գործընթացի երաշխավոր երկրները Իսրայելի գործողություններն անվանել են միջազգային իրավունքի, միջազգային հումանիտար իրավունքի, Սիրիայի ինքնիշխանության եւ տարածքային ամբողջականության խախտում:
Բացի այդ, իսրայելական բանակի գրոհները համարել են ապակայունացնող եւ տարածաշրջանում լարվածությունն ուժեղացնող։
Նոյեմբերի 19-ին Սիրիայի պաշտպանության նախարարությունը հայտարարել է, որ իսրայելական ռազմաօդային ուժերը ավիահարվածներ են հասցրել Սիրիայի բանակի դիրքերի ուղղությամբ։
Ավելի ուշ Իրանում հայտարարել են, որ Սիրիայում իսրայելական գործակալների կողմից տեղադրված ռումբի պայթյունի հետեւանքով զոհվել է Իսլամական հեղափոխության պահապանների կորպուսի օդատիեզերական ուժերի հրամանատարության բարձրաստիճան ներկայացուցիչ, գնդապետ Դաուդ Ջաֆարին:
