Ինձ են դիմել Կիչան եւ Ղազանչի գյուղերի մի խումբ բնակիչներ, որոնք իրենց սեփականաշնորհած վարելահողերում կատարել են հերկ, սակայն ցանքսը չեն կարողանում կատարել թշնամու կողմից կրակահերթերի տակ գտնվելու պատճառով: Այս մասին, այսօր՝ նոյեմբերի 23-ին, Արցախի Ազգային ժողովի արտահերթ նիստում ասաց «Միասնական հայրենիք» խմբակցությունից Դավիթ Սարգսյանը:
Նա հարց ուղղեց Արցախի նախագահ Արայիկ Հարությունյանին, թե ինչ միջոցառումներ են ձեռնարկվում նման բնակավայրերի բնակիչների անվտանգությունն ապահովելու ուղղությամբ:
Ի պատասխան Արցախի նախագահն ասաց. «Ամեն օր բանակցում ենք խաղաղապահների հետ, նման դեպքերի առումով միշտ արձագանքում ենք եւ փոխանցում ենք, փորձում ենք լուծումներ տալ: Փակ քննարկման ժամանակ կփորձենքավելի մանրամասն ներկայացնել: Ոչ միայն այդ հատվածում, տարբեր հատվածներում Ադրբեջանը խոչընդոտում է գյուղատնտեսական աշխատանքների իրականացմանը»: