Ադրբեջանի նախագահ Իլհամ Ալիեւը նորից փորձել է խելամիտ տեսք հաղորդել «Զանգեզուրի միջանցքի» տրամադրման պահանջին՝ միաժամանակ չխորշելով Իրանին պոտենցիալ գործողություն, ավելի ճիշտ՝ անգործություն վերագրելուց։
«Զանգեզուրի միջանցքն ուղղված չէ որեւէ մեկի դեմ, այն բարիք կբերի շահագրգիռ բոլոր կողմերին»,- ասել է Ալիեւը «Միջին միջանցքի երկայնքով. աշխարհաքաղաքականություն, անվտանգություն եւ տնտեսություն» միջազգային համաժողովում։
«Մենք Զանգեզուրի միջանցքը քննարկել ենք ռուսաստանցի պաշտոնյաների հետ մեր վերջին խոսակցության ժամանակ։ Չեմ կարծում, թե Հայաստանը կարող է արգելափակել այդ միջանցքը։ Ինչ վերաբերում է Իրանին, կարծում եմ, որ նա եւս չի անի դա՝ հաշվի առնելով նրա շահագրգռվածությունը տարածաշրջանային հաղորդակցային նախագծերում։ Այդ նախագծերն ուղղված չեն որեւէ մեկի դեմ, ընդհակառակը, միայն բարիք են բոլոր շահագրգիռ կողմերի համար»,- ասել է Ալիեւը։
Հիշեցնենք, որ ոչ մի փաստաթղթով նախատեսված չէ Ադրբեջանին Հայաստանի տարածքով «միջանցքի» տրամադրում։ Խոսքը բոլոր փաստաթղթերում բոլոր հաղորդակցությունների բացման մասին է։ Բայց Բաքուն պնդում է «Զանգեզուրի միջանցքի» մասին, ընդ որում՝ լռության է մատնում հայկական կողմի համար իր հաղորդակցությունների բացման հարցը։
