Նոյեմբերի 30-ին Բունդեսթագում Գոլոդոմորը որպես ցեղասպանություն ճանաչելու մասին քվեարկություն կանցկացվի, գրում է Spiegel-ը՝ վկայակոչելով բանաձեւի նախագիծը։
Քվեարկության նախաձեռնողները Սոցիալ-դեմոկրատական կուսակցության, Կանաչների, Ազատ դեմոկրատական կուսակցության եւ Քրիստոնեա-դեմոկրատական միության պատգամավորներն են:
«Ողջ Ուկրաինան, եւ ոչ միայն հացահատիկ արտադրող շրջանները, տուժել են սովից եւ բռնաճնշումներից։ Այսօրվա տեսանկյունից ակնհայտ է պատմաքաղաքական դասակարգումը որպես ցեղասպանություն։ Գերմանիայի Բունդեսթագը կիսում է այս դասակարգումը»,-ասվում է փաստաթղթի նախագծում։
1932-1933 թվականներին ԽՍՀՄ հացահատիկային հիմնական շրջանները սովի մեջ էին։ Երկրում պարենային ճգնաժամի հետեւանքով, տարբեր գնահատականներով, տարբեր ազգությունների մինչեւ 7-8 միլիոն մարդ է մահացել։ Ուկրաինական ԽՍՀ-ում սովից մահացածների թվի մասին ստույգ տվյալներ չկան։ Ըստ ժամանակակից ժողովրդագիրների՝ 1933 թվականին Ուկրաինական ԽՍՀ-ի համար ավելորդ մահացության հավանական մակարդակը տատանվում էր 2,2 միլիոնից մինչեւ 3,9 միլիոն մարդ:
Ուկրաինայի իշխանությունները Գոլոդոմորը «ցեղասպանություն» են ճանաչել 2006 թվականին։
