Ուկրաինան Ռուսաստանի ռազմական օբյեկտներին հարված հասցնելու իրավունք պետք է ունենա։ Այս մասին հայտարարել է Լատվիայի արտաքին գործերի նախարար Էդգարս Ռինկեւիչը, հայտնում է Bloomberg-ը։
«Մենք պետք է թույլ տանք, որ ուկրաինացիները զենք օգտագործեն հրթիռային օբյեկտները կամ օդանավակայանները ոչնչացնելու համար, որտեղից սկսվում են այդ գործողությունները» - ասել է Ռինկեւիչը: Նա հավելել է, որ դաշնակիցները «չպետք է վախենան» էսկալացիայից։
Թեեւ ԱՄՆ-ն սահմանափակումներ չի մտցրել այն բանի վրա , թե ինչպես է Ուկրաինան զենք օգտագործում, սակայն առայժմ հրաժարվում է բավականաչափ հեռահարությամբ զենք ուղարկել՝ Ռուսաստանի տարածքին հարվածելու համար:
Բայդենի վարչակազմը Ուկրաինային տրամադրում է ավելի ու ավելի բարդ սպառազինություն, այդ թվում՝ համազարկային կրակի համակարգեր, սակայն պաշտոնյաները ձեռնպահ են մնացել մարտավարական հրթիռային համակարգ ուղարկելուց, որը հայտնի է որպես ATACMS, քանի որ այն կարող է խոցել Ռուսաստանի ներսում գտնվող թիրախները:
Վաշինգտոնը մինչ այժմ հրաժարվում է կործանիչներ տրամադրել՝ վկայակոչելով այն գնահատականները, որ ինքնաթիռները չեն բարելավի Ուկրաինայի հեռանկարները։ Ավելի մեծ հեռահարության սպառազինությունների ներմուծումը մտավախություն է առաջացրել, որ հակամարտությունը կարող է սրվել կամ ընդլայնվել դեպի ՆԱՏՕ-ի տարածք:
Այդ մտահոգությունները կիսում է Տեխասի հանրապետական պատգամավոր Մայքլ Մաքքոլը, որը պետք է զբաղեցնի Ներկայացուցիչների պալատի արտաքին հարաբերությունների հանձնաժողովի նախագահի պաշտոնը այն բանից հետո, երբ Հանրապետական կուսակցությունը հունվարին կստաա Ներկայացուցիչների պալատի վերահսկողությունը: Հարցազրույցում նա ասել է, որ նման հարձակումները կխաթարեն Ուկրաինային տրամադրվող հանրային աջակցությունը: Ռուսաստանին հարվածները «զանգվածային արձագանք կառաջացնեն Ռուսաստանի կողմից, եւ դա իսկապես կսրի իրավիճակը»,- ասել է Մաքքոլը Bloomberg News-ին: «Դուք պետք է կշռեք հսկայական արձագանքը համաշխարհային հասարակական կարծիքը»:
Ռինկեւիչսն ասել է, որ անդամ մի քանի այլ երկրներ նույնպես կարծում են, որ Ուկրաինան ընդհանրապես չպետք է սահմանափակումներ ունենա զենքի օգտագործման հարցում, բայց դա, ի վերջո, կախված է առանձին երկրներից, թե ինչ զենք տրամադրեն Կիեւին:
Լիտվայի արտաքին գործերի նախարար Գաբրիելիուս Լանդսբերգիսը հայտարարել է, որ որոշ երկրներ բարձրացնում են այն հարցը, թե արդյոք դաշնակիցները պետք է զենք տրամադրեն առանց պայմանների, թեեւ «փոխհամաձայնությունը չի փոխվել»: Լանդսբերգիսի խոսքով՝ Կիեւը պատերազմի սկզբից զենք է ուզում դաշնակիցներից՝ առանց «քաղաքական վերապահումների»։
Իտալիայի արտաքին գործերի նախարար Անտոնիո Տաջանին Bloomberg-ին ասել է, որ «մենք չենք ցանկանում խնդիրներ այլ երկրների հետ»՝ հայտարարելով, որ «մեզ անմիջական վտանգ չի սպառնում»։ «Մենք դեմ ենք հակամարտության սրմանը».