ԱՄՆ իշխանությունները հավաստիացրել են Իտալիային, որ նրա բանկերը չեն ենթարկվի տուգանքների՝ ռուսական պատժամիջոցները խախտելու համար, եթե օգնեն «Լուկօյլ»-ին պատկանող նավթավերամշակման գործարանին ոչ ռուսական նավթ գնել, շաբաթ օրը հայտարարել է Իտալիայի արդյունաբերության նախարար Ադոլֆո Ուրսոն, հայտնում է Reuters-ը։
Երաշխիքը պետք է օգնի Սիցիլիայում հիմնված ISAB գործարանին մնալ ջրի երեսին այն բանից հետո, երբ դեկտեմբերի 5-ից ուժի մեջ կմտնի ռուսական նավթի վրա ծովային եվրոպական էմբարգոն՝ պահպանելով տեղական աշխատատեղերը եւ վառելիքի ազգային պաշարները:
«Մենք վարկային հարմարավետություն ունենք, երաշխիք, որ բանկերը, որոնք ֆինանսավորում են միջանկյալ գործարքները [ISAB-ի օգնության համար] չեն ընկնի ԱՄՆ պատժամիջոցների տակ»,- սիցիլիական Կատանիա քաղաքում տեղի ունեցած միջոցառման շրջանակներում լրագրողներին ասել է Ուրսոն:
Ուկրաինայում կոնֆլիկտի բռնկումից հետո ISAB-ը ստիպված է եղել հույսը դնել բացառապես ռուսական նավթի վրա այն բանից հետո, երբ վարկատու բանկերը դադարեցրել են ֆինանսավորումը եւ դադարեցրել այլընտրանքային մատակարարներից նավթ գնելու համար անհրաժեշտ երաշխիքների տրամադրումը:
Եվրոպայում պատժամիջոցները չեն տարածվում «Լուկօյլ»-ի վրա, սակայն բանկերը նախկինի պես դժկամությամբ են գործարքներ կնքում Ռուսաստանի հետ կապված ընկերության հետ, քանի որ վախենում են ապագայում հնարավոր տուգանքներից ԱՄՆ-ում, որտեղ ընկերությունը 2014 թվականից ի վեր ոլորտային պատժամիջոցների տակ է:
Այս շաբաթ Իտալիայի կառավարությունը մշակել է նավթավերամշակման գործարանի հոգաբարձության սխեման: Նման քայլի էր դիմել Գերմանիան, երբ սեպտեմբերին վերահսկողության տակ վերցրեց «Ռոսնեֆտ»-ին պատկանող նավթավերամշակման գործարանը:
Ուրսոն ասել է, որ նավթավերամշակման գործարանը չի կարող հայտնվել կառավարության «ժամանակավոր» վերահսկողության տակ, քանի դեռ «Լուկօյլ»-ը շարունակում է ակտիվների վաճառքի բանակցությունները՝ հավելելով, որ պետության կողմից վերահսկվող իտալական Eni էներգետիկ խմբին կարող է խնդրել աջակցել խնամակալությանը:
Կառավարությունը կարող է դիմել «նավթային ընկերությանը, որը գործում է այս ոլորտում, եւ բոլորի համար ակնհայտ է, որ դա (ընկերությունը) կարող է Eni-ն լինել, ինչը կապահովի արտադրության շարունակականությունը»,- ասել է նա։
«Լուկօյլ»-ի ստորաբաժանումը, որին պատկանում է ISAB-ը, ուրբաթ օրը հայտարարել է, որ նավթավերամշակման գործարանը կարող է շարունակել աշխատանքը՝ չնայած ռուսական նավթի մոտալուտ էմբարգոյին, հենվելով առաջիկա ամիսների համար կուտակված հումքի եւ, Ռուսաստանի հետ մեկտեղ, այլ երկրներից նավթի ապագա մատակարարումների վրա:
