Կարեւորագույն նախագիծը ներկայացնելիս մի բերեք հասարակության տարբեր սոցիալական խմբերին իրար հակադրելու հիմնավորումը: Այս մասին այսօր՝ դեկտեմբերի 6-ին, ԱԺ-ում Հարկային օրենսգրքում փոփոխություններ և լրացումներ կատարելու մասին օրենքի նախագծի քննարկման ժամանակ, որով նախատեսվում է համընդհանուր հայտարարագրման ինստիտուտի ներդրումը, դիմելով ՔՊ-ական պատգամավոր Բաբկեն Թունյանին, ասաց, նույն խմբակցության պատգամավոր Գուրգեն Արսենյանը:
«Պետության մեջ բոլոր խմբերն իրենց կարեւոր դերակատարումն ունեն: Կարծում եմ՝ այս օրենքի ընդունումը պետք է ծառայի այլ նպատակների: Սոցիալական արդարության գաղափարախոսությունը, ճիշտ է, գրավիչ է, բայց արդյունավետ չի: Սոցիալական արդարությունը չի կառուցվում հարստությունը վերաբաշխելով, սոցիալական արդարության լավագույն լուծումը հարստություն ստեղծելն է, աղքատներին հաստացնելն է, ոչ թե հարուստներին աղքատացնելը»,-ասաց նա:
Ի պատասխան Թունյանն ասաց. «Եթե մենք սոցիալական քաղաքականություն ենք իրականացնում, պետք է նաեւ հստակ չափանիշներ լինեն: Երբ ես ասում եմ, որ մեկը ենթադրենք իր տանն ունի մի քանի տասնյակ հազար դոլարոնց նկար, մյուսը չունի, դա չի նշանակում, որ մեկը լավ մարդ է, մյուսը վատ: Դա նշանակում է, որ եթե պետությունը սոցիալական քաղաքականություն է իրականացնում, դա պետք է անի թիրախային, ոչ թե օրինակ, կովիդի ժամանակ օգնություն տրամադրեինք էլէներգիայի փոխհատուցման տեսքով, հետո պարզվեր, որ այդ օգնությունը ստացել են նաեւ դոլարային միլիոնատերերը»:
Թանկարժեք նկարի մասին համեմատությունը դուր չէր եկել Գուրգեն Արսենյանին, քանի որ նա տանը թանկարժեք նկարներ ունի, եւ նա ասաց. «Պատին կախված նկարը, որը մարդուն օրինակ, նվեր են տվել, ու դա հետո թանկացել է, մոռացեք էդ նկարների մասին: Դա հաճելի օրինակ, է բայց չի արտացոլում այն խնդիրը, որը մեր հանրությանն այսօր մտահոգում է: Ուրախ եմ, որ Սարյանի նկարները թանկ արժեն, այլ նկարիչներ էլ կան, որոնց նկարները էլի թանկ արժեն: Հետո՞, հո մարդիկ կրակը չեն ընկել, որ իրենց տանը նկար ունեն»,-ասաց Արսենյանը:
Գուրգեն Արսենյանի «բողոքը» հասկանալի է, քանի որ 2021թ․ գույքի, եկամուտների, շահերի և ծախսերի հայտարարագրի համաձայն ունի 16 միավոր թանկարժեք գույք, որից 3-ը՝ նկարների հավաքածու: Արսենյանի ունեցած միայն 3 նկարի արժեքը մոտ 533 մլն դրամ է:
Ըստ Արսենյանի 2021թ․ հայտարարագրի՝ ունի 2 ժամացույց՝ 51 մլն 300 հազար և 82 մլն դրամ արժեքով, 32 մլն դրամ արժողությամբ ոսկու ձուլակտոր, 18 մլն դրամ արժողությամբ ոսկյա հուշադրամների հավաքածու, ինչպես նշեցինք՝ 3 նկար՝ ընդհանուր 533 մլն դրամ արժեքով:
Արսենյանը հայտարարագրել է նաև 300 հազ. ԱՄՆ դոլար արժողությամբ ճաշասենյակի կահույքի հավաքածու, 18 մլն դրամ արժեքով հյուրասենյակի կահույքի հավաքածու, 110 մլն դրամ արժողությամբ հյուրասենյակի կահույքի հավաքածու, ինչպես նաև 62 մլն դրամ արժողությամբ ննջասենյակի կահույքի հավաքածու։
Արսենյանն ունի նաև 5 մլն դրամանոց հեռուստացույց, 6 մլն դրամանոց ակոսափող հրացան, 70 հազ. ԱՄՆ դոլար արժողությամբ ճաշի սպասքի անվանական հավաքածու, 48 հազ. ԱՄՆ դոլար արժողությամբ արծաթյա սպասքի հավաքածու, 8500 դոլարանոց հեռադիտակ:
