Նավթի համաշխարհային գները չորեքշաբթի առավոտյան փոքր-ինչ բարձրանում են նախորդ մի քանի օրերի նվազումից հետո, վկայում են աճուրդների տվյալները։

Brent տեսակի նավթի փետրվարյան ֆյուչերսի գինը բարձրացել է 0,3 տոկոսով՝ մեկ բարելը 79,58 դոլար, WTI-ի հունվարյան ֆյուչերսինը՝ 0,23 տոկոսով՝ 74,42 դոլար։

Նավթի արժեքը բարձրանում է վերջին աճուրդներում նվազելուց հետո։ Նավթի երկու տեսակների ֆյուչերսների գները երեք օրում իջել էին մոտ 8 տոկոսով՝ ԱՄՆ-ում հնարավոր ռեցեսիայի մտավախության հետ կապված, քանի որ շարունակվում էին տոկոսադրույքի բարձրացումները երկրի Դաշնային պահուստային համակարգի կողմից։ Ռեցեսիան կարող է դառնալ «սեւ ոսկու» պահանջարկի նվազման պատճառ։