Ստեփանավան եւ Աշոցք քաղաքներում Սպիտակի երկրաշարժից ավերված թաղամասերի փոխարեն նորերը կհայտնվեն։ Դեկտեմբերի 7-ին Ազգային ժողովի նիստում այս մասին հայտարարեց Քաղաքաշինության կոմիտեի ղեկավար Արմեն Ղուլարյանը՝ պատասխանելով պատգամավորների հարցերին։

Նրա խոսքով՝ Աշոտաբերդում (Ստեփանավան քաղաքի վարչական շրջան-խմբ.) նախագծային աշխատանքներն արդեն մոտենում են իրենց տրամաբանական ավարտին։ «Մենք ընդունեցինք նախագծերը եւ փոփոխություններ կատարեցինք։ Կարելի է ասել, որ 2 օրվա ընթացքում դրանք պատրաստ կլինեն։ Այս շրջանում կար 24 շենք։ Հիմա կլինի 15։ Նախագիծը կարժենա 6,5 մլրդ դրամ եւ կավարտվի 2025 թվականի վերջին։ 2023 թվականի բյուջեով արդեն հատկացվել է մոտ 600 մլն դրամ։ Նախագծային աշխատանքների ավարտից հետո կհայտարարվի մրցույթ շինարարության համար»,- ասաց Ղուլարյանը։

Ինչ վերաբերում է Աշոցքին, ապա նախագծման համար մրցույթը, ինչպես նշեց պաշտոնյան, արդեն հայտարարված է, իսկ պայմանագիրը կնքված է։ «Այս նախագծի նախապատրաստումը կավարտենք հաջորդ տարի։ Հուսով ենք, որ 2023 թվականին պետական ​​բյուջեից կհատկացվեն բոլոր անհրաժեշտ միջոցները։ Դրանք մեզ թույլ կտան սկսել շինարարությունը»,- ասաց Ղուլարյանը՝ հավելելով, որ նախագիծը գնահատվել է 4,2 մլրդ դրամ։

Նա հայտնեց նաեւ, որ այս պահին Սպիտակում տներ են կառուցվում, որոնք հետագայում կփոխարինեն փայտե հանրակացարաններին։ «Դրանք կավարտվեն արդեն հաջորդ տարի։ Եվս մեկ նախագիծ է մշակվում Գյումրիի համար»,- ասաց Քաղաքաշինության կոմիտեի ղեկավարը։