Գյումրիում 2023 թվականին մենք 28 փողոց վերականգնելու ենք, որոշ թաղամասերում այս պահին էլ ընթանում են աշխատանքները: Այս մասին, այսօր՝ դեկտեմբերի 7-ին, Գյումրիում լրագրողների հետ ճեպազրույցում հայտարարեց ՀՀ փոխվարչապետ Համբարձում Մաթևոսյանը:
«Փորձում ենք դա անել հիմնարար լուծումներով, այսինքն ստորգետնյա ենթակառուցվածքներ, ասֆալտապատ ճանապարհներ, մայթեզրեր: Գալիս տարվա ավարտին, կարծում եմ՝ Անի թաղամասն ամբողջությամբ կլինի նոր ասֆալտապատված փողոցներով:
Ունենք նաեւ այլ ծրագրեր, օրինակ, Բարեկամության այգին, որն իրականացվում է Ազգային զարգացման հիմնադրամի հետ համատեղ, Արթուր Ալեքսանյանի անվան մարզահամալիրը, որը տարածաշրջանում նմանը չունեցող համալիր է լինելու: Փորձելու ենք զարկ տալ նաեւ տուրիզմի ենթակառուցվածքներին: Սլոբոդկա թաղամասում շինարարական աշխատանքները կսկսենք 2023-ի երկրորդ կեսին, ինչպես նաեւ չմոռանանք սուբվենցիոն ծրագրերի մասին: 2023-ի համար համայնքից ստացել ենք 7 մլրդ դրամի չափով սուբվենցիոն ծրագիր»,-ասաց նա:
Նշենք, որ 11:41-ին Գյումրի այցելած բարձրաստիճան պաշտոնյաները՝ ՀՀ փոխվարչապետ Համբարձում Մաթևոսյանի գլխավորությամբ, ինչպես նաև դիվանագիտական ու ուժային կառույցների ներկայացուցիչները գյումրեցիների հետ ծաղիկներ խոնարհեցին «Անմեղ զոհերին, բարեգութ սրտերին» հուշակոթողի մոտ և մեկ րոպե լռությամբ հարգանքի տուրք մատուցեցին 1988 թվականի ավերիչ երկրաշարժի զոհ դարձածների հիշատակին:
