Իսրայելի ֆինանսների նոր նախարարը հայտարարել է, որ իր տնտեսական ռազմավարությունը հիմնված կլինի Տորայում նշված կրոնական համոզմունքների վրա՝ կանխատեսելով, որ դա կօգնի երկրի բարգավաճմանը, հաղորդում է Reuters-ը:
Ծայրահեղ աջ «Կրոնական սիոնիզմ» կուսակցության ղեկավար Բեցալել Սմոտրիչն ասել է, որ որպես ֆինանսների նախարար, ինքը խորը կխրվի տնտեսության ներքին աշխատանքում: Սակայն, նա նշել է, որ Տորան սովորեցնում է, որ Աստծուն հնազանդվելը բարգավաճում է բերում:
Նա նաեւ առաջարկել է փոփոխել նոր կառավարության ծախսերի առաջնահերթությունները, այդ թվում՝ մեծացնել կրոնական հետազոտությունների բյուջեն:
Վարչապետ Բենիամին Նեթանյահուն Սմոտրիչին երկու տարով ֆինանսների նախարար նշանակել։ Այնուհետեւ նրան կփոխարինի Արյեհ Դերին, որը ղեկավարում է ծայրահեղ ուղղափառ կուսակցությունը:
Նեթանյահուն հինգշաբթի օրը խորհրդարանական մեծամասնություն է ստացել՝ նոյեմբերի 1-ի ընտրություններում հաղթելուց հետո, սակայն նա դեռ պետք է վերջնական տեսքի բերի կոալիցիոն համաձայնագրերը: Քանի դեռ նա դա չի արել, ժամանակավոր կառավարությունը մնում է իշխանության ղեկին:
Սմոտրիչն ավելի հայտնի է իր կոշտ քաղաքականությամբ, քան իր տնտեսական հայացքներով, որոնք, ըստ նրա կուսակցության պլատֆորմի, ֆինանսական առումով պահպանողական են:
Իր մոտեցման մասին նա խոսել է ծայրահեղ ուղղափառ «Միշպաչա» ամսագրին տված հարցազրույցում։
«Նրանք փորձել են շատ տնտեսական տեսություններ, ճի՞շտ է: Նրանք փորձել են կապիտալիզմը, փորձել են սոցիալիզմը։ Կա մի բան, որ նրանք չեն փորձել. «եթե դուք հպատակվեք»,- ասել է Սմոտրիչը՝ նկատի ունենալով հրեական սուրբ գրությունը, որը մարդկանց կոչ է անում հետեւել Աստծո կամքին:
Նրա խոսքով՝ հավատացյալները, այդ թվում՝ ինքը, կարծում են, որ «որքան ավելի շատ Իսրայելը քարոզի Տորան, հուդայականությունը, բարությունը եւ համերաշխությունը, այնքան Տերը մեզ մեծ առատություն կպարգեւի»։
Կրոնական Kikar Hashabat լրատվական կայքին տված առանձին հարցազրույցում Սմոտրիչն ասել է, որ նոր առաջնահերթություններ է ակնկալում նոր կառավարությունից՝ հավելելով, որ կրոնական ճեմարանների պետական ֆինանսավորումը «զգալիորեն կավելանա»:
Պարտադիր զինվորական ծառայության փոխարեն շատ ծայրահեղ ուղղափառ տղամարդիկ կրոնական դպրոցներ կհաճախեն, ինչը տարաձայնությունների թեմա է իսրայելցիների շրջանում: Միեւնույն ժամանակ, կառավարության տվյալներով, ուլտրաուղղափառ տղամարդկանց միայն կեսն է աշխատում: Շատերը նախընտրում են իրենց ժամանակը տրամադրել Տորայի ուսումնասիրությանը:
Իսրայելի կենտրոնական բանկը հայտարարել է, որ դա հյուծում է տնտեսությունը, եւ խթաններ է առաջարկել՝ ավելի շատ ծայրահեղ ուղղափառ տղամարդկանց աշխատաշուկայում ներգրավելու համար:
