«Դավինչի» տուրիստական ընկերությանը պատկանող անշարժ գույքերը հրապարակային սակարկությունների միջոցով վաճառելու որոշման պահին դատարանին հայտնի չի եղել քննիչի կողմից կալանք կիրառված լինելու մասին տեղեկությունը։ Այս մասին NEWS.am-ին պարզաբանեցին Սնանկության դատարանից։
«ՀՀ սնանկության դատարանը հարկ է համարում պարզաբանել, որ նշված որոշման կայացման պահին այդ գույքերի նկատմամբ քննիչի կողմից կալանք կիրառված լինելու մասին տեղեկություն դատարանին հայտնի չի եղել։ Հորդորում ենք ձեռնպահ մնալ դատական իշխանության կայացրած ակտերի վերաբերյալ անհիմն գնահատականներ տալուց»,- նշվում է պարզաբանման մեջ։
Նշենք՝ փաստաբան Րաֆֆի Ասլանյանը հայտարարել էր, որ Սնանկության դատարանը թույլատրել է «Դավինչի» ՍՊԸ-ի տնօրենին պատկանող անշարժ գույքերը հրապարակային սակարկությունների միջոցով վաճառել այն պարագայում, երբ քրեական վարույթով, քննիչի որոշմամբ, կալանք է դրված այդ գույքերի վրա:
