News
Լրահոս
News
Հինգշաբթի
Հուլիս 25
Տեսնել լրահոսը

Ոչ մի ապագա՝ բացի հայկականից։ Մենք պատրաստ ենք Ադրբեջանի հետ հարեւանություն անել, նորմալ հարաբերություններ ունենալ, բայց անկախ կարգավիճակի հարցը չի կարող բանակցությունների կամ քննարկման առարկա լինել։ Այս մասին ֆրանսիական «Ֆրանս 24» պետական հեռուստաընկերությանը տված հարցազրույցում ասել է Արցախի նախագահ Արայիկ Հարությունյանը։

Անդրադառնալով 44–օրյա պատերազմից հետո Արցախում ստեղծված իրավիճակին, նախագահը խոսել է հումանիտար խնդիրներից, նշել, որ Կառավարության  հիմնական խնդիրը  40 հազար տեղահանված արցախցիների համար անհրաժեշտ պայմանների ստեղծումն է։

«Ցավոք, Ադրբեջանի պատճառով շատ մարտահրավերներ ենք ունենում, շատ խնդիրների հետ ենք բախվում, Ադրբեջանը ջանում է ցանկացած միջոցներով մեզ խանգարել իր սադրիչ գործողություններով, խաղաղ բնակչության նկատմամբ մշտական հրաձգություններով, իսկ վերջերս էլ որոշակի խնդիրներ ենք ունեցել Լաչինի միջանցքով երթեւեկության հետ կապված, ի դեպ, դա մեր միակ կապն է արտաքին աշխարհի հետ, հնարավոր բոլոր միջոցներով փորձում ենք մնալ կանգուն»,– ասել է Արայիկ Հարությունյանը:

Արցախի նախագահն իր երախտագիտությունն է հայտնել Ֆրանսիային՝ դեռեւս 2020 թվականից  մինչ այժմ ընդունված 4 հայանպաստ եւ Ադրբեջանին դատապարտող բանաձեւերի համար։

«Մեզ պետք է աջակցի միջազգային հանրությունը, այդ թվում՝ Ֆրանսիան, բայց, դժբախտաբար.... Անկասկած մենք ավելի կարիքն ունենք, քան բարոյական աջակցությունն է։ Այս տեսանկյունից պատերազմից հետո  սա իմ առաջին այցելությունն է Եվրոպա, ես որոշել եմ սկսել Ֆրանսիայից, քանի որ Ֆրանսիայի քաղաքական դաշտը, հասարակական կարծիքը շատ ակտիվ ու միաբանված են Արցախի հարցի վերաբերյալ: Մենք հույս ունենք, որ Ֆրանսիան չի սահմանափակվի դրանով, եւ այդ աջակցությունը օրինակ կհանդիսանա մյուս պետությունների համար: Նրանք նույնպես կներգրավվեն մեր հիմնախնդրի արդյունավետ կարգավորման ընթացքին, որի ճանապարհը բացում է հենց Ֆրանսիան»,- ասել է Հարությունյանը:

Արցախի նախագահը շեշտել է, որ հայ ժողովուրդը նոր ցեղասպանության վտանգի առջեւ է հայտնվել, քանի որ «Արցախին միայնակ թողնելը, նշանակում է Արցախի բնակչությանը թողնել ֆիզիկական ոչնչացման»:

«Մենք չենք կարող թողնել մեր հայրենիքը, հազարամյակներ շարունակ մենք այդտեղ ապրում ենք ու կշարունակենք ապրել»,– ասել է նա։

Հաղորդավարի հարցին, թե արդյոք Արցախի չլինելու դեպքում վտանգ է սպառնում Հայաստանին, Հարությունյանը պատասխանել է.

«Միանշանակ, Ադրբեջանն ու Թուրքիան չեն թաքցնում իրենց ծրագրերը Սյունիքի վերաբերյալ եւ Զանգեզուրի միջանցքի պատրվակի տակ հավակնում են ՀՀ ամբողջ տարածքին: Մենք գիտակցում ենք, որ այսօր միայն Արցախի մասին չէ խոսքը, ամբողջ ՀՀ-ն է վտանգված, ամբողջ հայ ժողովուրդը, եւ սեպտեմբերյան զարգացումները, երբ ադրբեջանական զորքերը ներխուժեցին ՀՀ տարածք, դրա վառ ապացույցն են»:

Անդրադառնալով հարցին, թե խաղաղության բանակցություններում կան նաեւ միջնորդներ Ռուսաստանը, ԱՄՆ–ն ու Ֆրանսիան, արդյոք ինքը հաղորդակցվում է այդ միջնորդների հետ, Արայիկ Հարությունյանն ասել է, թե ոչ մեկը Արցախի հետ չի բանակցում։

«Ադրբեջանը հրաժարվում է մեզ հետ ցանկացած բանակցությունից։ Մենք հումանիտար հրատապ հարցերով կապ ունենք Ադրբեջանի ներկայացուցիչների հետ, բայց երբեք Արցախի կարգավիճակի, ապագայի կամ որեւէ քաղաքական հարցով։ Ես առավել քան ափսոսում եմ, որ չկան նման բանակցություններ նաեւ Հայաստանի եւ Ադրբեջանի միջեւ, ինչպես նաեւ միջազգային միջնորդների հետ»,– ասել է նա։

Արայիկ Հարությունյանը հայտարարել է, որ Արցախը չի կարող զիջել իր անկախությունը եւ համաձայն ՄԱԿ կանոնադրության, պայքարելու են մինչեւ վերջ։

«Ոչ մի ապագա՝ բացի հայկականից։ Մենք պատրաստ ենք Ադրբեջանի հետ հարեւանություն անել, նորմալ հարաբերություններ ունենալ, բայց անկախ կարգավիճակի հարցը չի կարող բանակցությունների կամ քննարկման առարկա լինել»,– ընդգծել է Արցախի նախագահը։

Հարցին, թե չի՞ քննարկվում արդյոք Հայաստանի հետ միացման տարբերակը, Արցախի նախագահն ասել է, որ յուրաքանչյուր արցախցու երազանքն է հայկական երկու պետությունների միավորումը, սակայն հասկանում են, որ միջազգային իրավունքի տեսանկյունից դա դեռեւս իրատեսական չէ:

«Մենք պատերազմի կողմնակից չենք, մենք խաղաղության կողմնակից ենք, պարզապես ցանկանում ենք, որ մեր իրավունքները ճանաչվեն, եւ, վերջապես, խաղաղություն հաստատվի մեր տարածաշրջանում»,- ասել է Արայիկ Հարությունյանը։

!
Այս նյութը հասանելի է նաև   Русский
Տպել
Կարդացեք նաև
Ամբողջը
Ալիևն այցելել է սեփական ագրեսիայի կառուցվող հուշահամալիր
PMD Projects-ի տնօրեն Նարիման Թոփչուբաշևն ասել է, որ այգին ավելի քան ինը հեկտար տարածք է զբաղեցնում...
Փաստաբան. Ադրբեջանն օգտագործում է գերեվարված հայերին քաղաքական նպատակներով
Վերջին 14 տարիների ընթացքում Ադրբեջանը մշտապես փոխել է իր նարատիվներն ու փաստարկները։ Եթե ​​վերցնենք...
Պետրոսյան. Հայաստանը պետք է պարբերաբար բարձրացնի Բաքվում ապօրինաբար պահվող հայերի հարցը
Այս անգամ զրուցեցինք Հայ-գերմանական իրավաբանների միության նախագահ, Էրլանգեն-Նյուրնբերգի համալսարանի և Նյուրնբերգի սկզբունքների միջազգային ակադեմիայի դասախոս...
Պաշտպանելու ենք Հայաստանի սահմանների անխախտելիությունը. Հելսինկյան հանձնաժողովի նախագահ
ՀՀ-ի համար խաղաղության համաձայնագիրը կարեւոր է նրանով, որ վստահ լինի, որ Ադրբեջանի կողմից ռազմական գործողություններ չեն լինի...
11 անհայտ կորածների ընտանիքները եւս երկու ամիս կստանան 300 հազարական դրամները
44-օրյա պատերազմում քաղաքացիական անձանց շրջանում 11 անհայտ կորածների...
44-օրյա պատերազմում զոհված հերոսների մայրերը հրավիրվել են «Աբովյան» ՔԿՀ-ում կազմակերպված «Մեզ բացակա չդնեք» միջոցառմանը
ՀՀ ԱՆ «Աբովյան» քրեակատարողական հիմնարկում «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի 19-ը և ավելի…
Ամենաշատ