Իրանում տեղի ունեցած անկարգություններին մասնակցած անձը, որը մեղավոր է ճանաչվել անվտանգության ուժերի երկու աշխատակցի սպանության մեջ, երկուշաբթի հրապարակայնորեն մահապատժի է ենթարկվել. նա կախաղան է բարձրացվել, տեղեկացրել է ISNA գործակալությունը։
Գործակալության տվյալներով՝ Մաջիդրեզա Ռահնավարդը Մեշհեդ քաղաքում դանակով մահացու վիրավորել էր անվտանգության ուժերի աշխատակիցներ Հոսեյն Զեյնալզադեին եւ Դանիյալա Ռեզազադեին ու դիմել էր փախուստի։ Ինչպես պատմել է ականատեսը, հանցագործը ճանապարհին սպանում էր բոլոր նրանց, ովքեր հայտնվում էին նրա ճանապարհին։ Ռահնավարդը կալանավորվել է երկրից փախչելու փորձի ժամանակ։
Իրանում հուզումներն սկսվել են սեպտեմբերի 16-ին, 22-ամյա Մահսա Ամինիի հուղարկավորությունից հետո։ Պաշտոնական վարկածի համաձայն՝ ոստիկանությունը կալանավորել էր Ամինիին գլխաշորը ճիշտ չկրելու պատճառով։ Հարցաքննության ժամանակ նա սրտի նոպա է ունեցել, որից էլ մահացել է։ Սոցիալական ցանցերում, սակայն, տարածվեց տեղեկատվություն այն մասին, որ Ամինիին ծեծել են ոստիկանները։ Հոկտեմբերի 7-ին Դատական բժշկության իրանական կազմակերպությունը հրապարակեց աղջկա մահվան պատճառների պաշտոնական եզրակացությունը, որտեղ նշվել էր, որ նրան վնասվածքներ են հասցվել։