Ուկրաինական պատերազմի պատճառով նախագահ Պուտինը հույսը դնում է Ադրբեջանի վրա՝ որպես Ռուսաստանից գազի մատակարարման կենտրոն՝ խուսափելով Եվրոպայի կողմից սահմանված պատժամիջոցներից: Այս մասին NEWS.am-ի թղթակցի հետ զրույցում ասաց Հարավային Կոնեկտիկուտի համալսարանի փիլիսոփայության պրոֆեսոր, Ցեղասպանության հետազոտողների միջազգային ասոցիացիայի առաջին փոխնախագահ Արմեն Մարսուբյանը։
Նրա գնմահատմամբ՝ այժմ Ռուսաստանն ավելի շատ աշխարհաքաղաքական շահեր ունի Ադրբեջանի, քան Հայաստանի։ «Եվ ես Ռուսաստանին վստահելի գործընկեր չեմ համարում»,- ասաց Մարսուբյանը։
Նա հանդես եկավ Ղարաբաղում, ինչպես նաեւ Հայաստանի եւ Ադրբեջանի սահմանին խաղաղապահ առաքելության միջազգայնացման օգտին։ «Հենց ԵԱՀԿ Մինսկի խումբը պետք է դեռեւս առաջին ղարաբաղյան պատերազմից հետեւեր հրադադարի պահպանմանը, եւ այդ ժամանակ դա կատարյալ ձախողում էր։ Ես գիտեմ, որ ԵՄ-ն իր դիտորդներին ուղարկել է հայ-ադրբեջանական սահման, բայց կարծում եմ, որ առաքելությունը պետք է միջազգայնացվի կամ Եվրամիության, կամ ՄԱԿ-ի միջոցով»,- ընդգծեց փորձագետը։
Արամ Դանիելյան
