Ադրբեջանը չի վերադարձնում գերիներին եւ հրաժարվում է խոսել պատանդների մասին։ Այս մասին Երեւանում կայացած ասուլիսում հայտարարեց Արցախի ԱԳ նախարարի պաշտոնակատար Դավիթ Բաբայանը։
«Քանի՞ գերի չի վերադարձվել, քանի՞ պատանդ չի վերադարձվել։ Այդ մասին Ադրբեջանը լռում է։ Ուստի միջազգային հանրությունը պետք է ավելի խիստ միջոցներ ձեռնարկի»,-նշեց Բաբայանը։
Պատասխանելով հարցին, թե հնարավոր է արդյոք, որ Լաչինի միջանցքի շրջափակման նման քայլերով Ադրբեջանը փորձում է զիջումների հասնել Հայաստանի կողմից, Բաբայանը չբացառեց, բայց նշեց, որ դա միջազգային իրավունքի կոպտագույն խախտում է․ «Հայ-ադրբեջանական հարաբերությունները հայելային կապ չունեն Արցախի հետ, դրանք այլ հարթության վրա են գտնվում։ Նման ճնշմամբ զիջումներ պահանջելն ինքնին միջազգային իրավունքի խախտում է։ Եվ նման գործողությունները միջազգային մարդասիրական իրավունքների նողկալի խախտում են»։