Անկարան կողմ է Ռուսաստանի, Թուրքիայի եւ Սիրիայի համատեղ քայլերին։ Այս մասին հայտարարել է Թուրքիայի նախագահ Ռեջեփ Էրդողանը, հաղորդում է Anadolu-ն։
«Դրա համար անհրաժեշտ է, որ հանդիպեն հատուկ ծառայությունների ներկայացուցիչները, ապա արտաքին գործերի նախարարները, հետո նոր պաշտպանության նախարարները։ Այդ քննարկումների արդյունքում հնարավոր կլինի խոսել առաջնորդների հանդիպման մասին։ Ես դա առաջարկել եմ պարոն Պուտինին, եւ նա նախաձեռնությունը դրական է ընդունել։ Դա սկիզբ կդնի բանակցությունների շարքին»,-ասել է նա։
Էրդողանը հիշեցրել Է Աստանայի ձեւաչափով ընդունված որոշումների, ինչպես նաեւ Սիրիայի հարցով Սոչիի պայմանավորվածությունների մասին: «Ինչի մասին էին Սիրիայի վերաբերյալ համաձայնագրերը։ Առաջին հերթին, ենթադրվում էր, որ ահաբեկիչները դուրս կբերվեն Թուրքիայի հետ սահմանային 30 կմ գոտուց։ Սա մեր «անվտանգության միջանցքն» է, եւ մենք բոլոր անհրաժեշտ քայլերը կձեռնարկենք այդ գոտում»,-հավելել է նա։
Նա ուշադրություն է հրավիրել նաեւ Սիրիայի արեւելքում տիրող իրավիճակի վրա, որտեղ նավթի եւ գազի խոշոր հանքավայրերը վերահսկվում են ԱՄՆ-ի գլխավորած միջազգային կոալիցիայի ուժերի կողմից: «Կոալիցիան վերահսկում է Սիրիայում նավթի հանքավայրերը։ Ո՞ւմ են վաճառում այս նավթը: Ասադի ռեժիմին։ Ո՞վ է վաճառում: Ահաբեկիչները։ Մենք մինչ օրս համբերել ենք, բայց մեր համբերությունը սպառվել է»,-ասել է Էրդողանը։
