Արցախում ռուս խաղաղապահների առաքելությունը շատ կարեւոր է, բոլոր կողմերը պետք է օգնեն եւ շահագրգռված լինեն խաղաղապահ զորակազմի գործունեությամբ։ Այս մասին ասել է ՀԱՊԿ գլխավոր քարտուղար Ստանիսլավ Զասը հեռուստակամրջի ընթացքում։
«Մենք ռուս խաղաղապահների իրականացրած առաքելությունը համարում ենք շատ կարեւոր ամբողջ տարածաշրջանի համար։ Այն դժվար է գերագնահատել։ Իհարկե, մեզ համար նշում ենք ոչ հեշտ պայմանները, հատկապես հիմա, երբ տեղի է ունեցել իրավիճակի սրում, այդ թվում Լաչինի միջանցքի շրջափակում։ Իհարկե, մեր կարծիքով, անհրաժեշտ է ազատություն տալ տեղաշարժվող մարդկանց եւ հումանիտար բեռներին։ Զրկանքները հասարակ մարդկանց համար անթույլատրելի են։ Անթույլատրելի է հումանիտար աղետը»,- ընդգծել է Ստանիսլավ Զասը։
Դեկտեմբերի 12-ի ժամը 10.30-ից ադրբեջանցի վայ-բնապահպանների, իրականում՝ քաղաքացիական հագնված զինվորականների եւ հատուկ ծառայությունների աշխատակիցների ամբոխը փակել է Արցախը Հայաստանին կապող միակ ճանապարհը։ Կեղծ բնապահպաններն ամեն կերպ սադրում են խաղաղապահներին, վիրավորում, միաժամանակ տարածում տեսանյութեր, որոնք կոչված են ահաբեկելու հայ բնակչությանը։ Ութ օր Արցախ անհնար է մթերքներ եւ դեղորայք հասցնել։ Ավելի քան հազար մարդ, այդ թվում երեխաներ, մնացել են ճանապարհին։ Դեկտեմբերի 13-ից Ադրբեջանը փակել էր գազի մատակարարումն Արցախ, բայց դեկտեմբերի 16-ին ստիպված է եղել վերականգնել գազամատակարարումը։