Կատալոնիայի կառավարության ղեկավար Պերե Արագոնեսը հայտարարել է, որ հույս ունի եկող տարի հաջողության հասնել Իսպանիայից Կատալոնիայի անկախացման հանրաքվեի անցկացման հետ կապված համաձայնագրի հարցում։ Այս մասին նշվել է Կատալոնիայի կառավարության թվիթերյան էջում։
Քաղաքական գործչի խոսքով՝ 2023-ը պետք է դառնա «համաձայնագրի հստակության» տարի, տարի, երբ պետք է հասնել ուժի եւ ներքին լեգիտիմության, «որպեսզի կարողանանք պաշտպանվել պետության առջեւ՝ որպես երկիր, որը կարող է ճանաչում ստանալ միջազգային մակարդակով»։
Արագոնեսն ընդգծել է, որ այժմ եկել է «նորից դեպի Կատալոնիայի անկախության հանրաքվեի անցկացման ճանապարհ բացելու ժամանակը»։
2017թ. հոկտեմբերի 1-ին Կատալոնիայում տեղի ունեցավ շրջանը Իսպանիայի կազմից դուրս բերելու հանրաքվե։ Մադրիդը քվեարկությունը ոչ լեգիտիմ ճանաչեց եւ հրաժարվեց ընդունել նրա արդյունքները։
Ավելի ուշ Կատալոնիայի խորհրդարանը հաստատեց անկախ հանրապետության հռչակման բանաձեւը, ինչին Իսպանիայի իշխանությունները պատասխանեցին սահմանադրության 155-րդ հոդվածի կիրառմամբ, որով թույլատրվում է սահմանափակել Կատալոնիայի ինքնակառավարումը։
