Գերմանական ընկերությունները ցանկանում են հաջորդ տարի ակտիվացնել գործունեությունը Աֆրիկայում, հատկապես այնպիսի ոլորտներում, ինչպիսիք են կանաչ ջրածինը եւ հեղուկ բնական գազը, ընդ որում ընկերությունների 43%-ը պլանավորում է մեծացնել ներդրումները մայրցամաքում, ցույց է տվել Reuters-ի հարցումը:
Գերմանա-աֆրիկյան բիզնես ասոցիացիայի անդամների հարցումը ցույց է տվել նաեւ, որ ասոցիացիայի անդամների եւս 39%-ը ձգտում է պահպանել Աֆրիկայում իր ծախսերի կայուն մակարդակը: «Ընկերությունների մեծ մասը ցանկանում է ընդլայնել իր գործունեությունը գալիք տարում,- ասել է ասոցիացիայի ղեկավար Քրիստոֆ Կանեգիսերը,- Դա իմաստ ունի, քանի որ մայրցամաքը դեռ գտնվում է աճի հետագծի վրա»:
Ըստ էկոնոմիկայի նախարարության՝ 2021 թվականին գերմանական ընկերությունները Աֆրիկայում ներդրել են մոտ 1,6 միլիարդ եվրո, որից մոտ 1,1 միլիարդ եվրոն բաժին է ընկել Սահարայից հարավ տարածաշրջանին։
Քանի որ Եվրոպայի խոշորագույն տնտեսությունը փորձում է նվազեցնել իր կախվածությունը Ռուսաստանից եկող գազից ուկրաինական պատերազմից հետո, Կանեգիսերն ասել է, որ մեծ հնարավորություններ է տեսնում Աֆրիկայի էներգետիկ ոլորտում: «Կանաչ ջրածնի եւ հեղուկ գազի ոլորտը նոր ազդակ կհաղորդի շատ երկրներում»,- ասել է նա՝ որպես ներդրումային ներուժ ունեցող երկրներ առանձնացնելով Սենեգալը, Նիգերիան եւ Մավրիտանիան:
Կանեգիսերն ասել է, որ Նամիբիան կարող է նաեւ հսկայական շահույթներ ստանալ կանաչ ջրածնի արտադրությունից:
Հարցումը ցույց է տվել, որ ընկերությունների 56%-ը դրական է գնահատել իր գործունեությունը Աֆրիկայում 2022 թվականին, եւս 7%-ը գնահատել է այն որպես «շատ լավ»:
Ասոցիացիան քննադատել է հունվարի 1-ից ուժի մեջ մտած օրենքը, որը խոշոր ընկերություններին պարտավորեցնում է պայքարել մարդու իրավունքների եւ կլիմայի խախտումների դեմ՝ ասելով, որ դա հակաարդյունավետ է, քանի որ այն ստեղծում է բյուրոկրատիայի նոր շերտ: