Ստեղծվում է իրավական համակարգում գործիքների ներդրման հնարավորություն, որոնց օգնությամբ Միջազգային քրեական դատարանի գործընկերների հետ միասին կարելի կլինի հետաքննել Ադրբեջանի հանցագործությունները՝ սկսած 2021թ. մայիսից։ Այս մասին դեկտեմբերի 29-ին լրագրողների հետ զրույցում ասել է արդարադատության նախարար Գրիգոր Մինասյանը՝ մեկնաբանելով Միջազգային քրեական դատարանի կանոնադրության վավերացման գործընթացի սկիզբը։
Դա, նրա գնահատմամբ, հեշտ գործընթաց չէ։
«Հայաստանի ինքնիշխան տարածքի դեմ հանցագործությունները հետաքննելու համար պրոֆեսիոնալների թիմ կներգրավվի»,- նշել է Մինասյանը։
Հիշեցնենք, որ Արցախի դեմ 44-օրյա պատերազմից հետո Ադրբեջանը բազմիցս ագրեսիայի է դիմել նաեւ Հայաստանի ինքնիշխան տարածքի դեմ։ Դրանցից ամենախոշորները տեղի են ունեցել 2021թ. մայիսին եւ նոյեմբերին, ինչպես նաեւ 2022թ. սեպտեմբերին։
