Ականապատ երկու մեքենաների պայթյունի հետեւանքով, որը կազմակերպել էին «Ալ-Շաբաաբ» խմբավորման գրոհայինները, զոհվել է առնվազն 15 մարդ, իսկ Սոմալիի Խիրան կենտրոնական շրջանի տները հավասարվել են հողին, տեղեկացրել է Reuters-ը՝ հղում կատարելով փրկարարական գործողություններին մասնակցող աղբյուրին։
Սա «Ալ-Քաիդայի« մասնաճյուղ «Ալ-Շաբաաբի» կատարած հարձակումների շարքում վերջինն էր այն ժամանակվանից ի վեր, երբ անցյալ տարի կառավարական զորքերը եւ դաշնակից կլանային աշխարհազորայիններ սկսել էին ապստամբներին վռնդել այն տարածքներից, որոնք նրանք երկար ժամանակ պահում էին իրենց ձեռքում։
«Ալ-Շաբաաբ» խմբավորումը ստանձնել է պայթյունի պատասխանատվությունը՝ հայտարարելով, որ գրոհի նպատակը եղել են «դավանափոխ աշխարհազորայինները եւ զինվորները»։ Խմբավորման վարկածի համաձայն՝ զոհվածների թիվը կազմել է 87 մարդ։
«Ալ-Շաբաաբը» ապստամբական պայքար է մղում Սոմալիի կառավարության դեմ 2007 թվականից։ Անցած տարի այն դուրս էր քշվել Խիրանից կառավարական զորքերի եւ դաշնակից կլանային աշխարհազորայինների կողմից (որոնք հայտնի են որպես մակավիսլի), բայց շարունակում է հարձակումներ կատարել։
Հարձակման ժամանակ զինվորները եւ աշխարհազորայինները ստացել են ԱՄՆ եւ Աֆրիկյան միության զորքերի աջակցությունը։
Երկրի նախագահ Հասան շեյխ Մոհամուդի կառավարությունը հավաստիացնում է, որ գործողությունների ընթացքում սպանվել են «Ալ-Շաբաաբի» հարյուրավոր գրոհայիններ եւ հետ են վերցվել տասնյակ բանակավայրեր, չնայած մարտական գործողությունների մասին շատ հայտարարություններ անկախ փորձագետները հաստատել չեն կարող։
«Ալ-Շաբաաբի» գոծողությունները սահմանափակել են նաեւ միջազգային օգնության մատակարարումները՝ խորացնելով Աֆրիկյան եղջյուրում վերջին չորս տասնամյակի ամենաուժեղ երաշտի հետեւանքները։
