Հայաստանը հայտնվել է Forbes-ի վարկանիշային ցուցակում՝ որպես 2023թ. տուրիստական լավագույն ուղղություններից մեկը։
«Հայաստանը գեղեցիկ երկիր է՝ հարուստ պատմությամբ եւ մշակույթով։ Այստեղ հիասքանչ բնանկարներ են՝ լեռներ, Սեւանա լիճ, բազմաթիվ հնագույն ճարտարապետական հուշարձաններ, ինչպիսին են Գառնիի տաճարը եւ Հաղպատի վանքը։ Դրանց մի մասը ՅՈւՆԵՍԿՕ-ի Ժառանգության ցուցակում է»,- գրել է Forbes-ը։
Բնության եւ հետիոտն զբոսանքի սիրահարները կարող են օգտվել 861 կիլոմետր երկարությամբ (535 մղոն) Անդրկովկասյան արահետով, որն անցնում է Հայաստանով։
Երկիրը հայտնի է նաեւ իր համեղ խոհանոցով, որտեղ օգտագործվում են տարատեսակ թարմ խոտաբույսեր եւ համեմունքներ։
«Եթե համադամասեր եք, անպայման համտեսեք հայկական ընտիր ճաշատեսակները՝ խաշ (տավարի եփած տոտիկներ), տոլմա (խաղողի թփով փաթաթված միս), մանթի եւ, իհարկե, տնական թթուներ»,- գրել է պարբերականը։
