Արեւմուտքը կարծում է, որ Ռուսաստանի ազդեցությունը տարածաշրջանում կարելի է նվազեցնել, եթե չլինեն հակամարտությունները, հայ-ադրբեջանական եւ հայ-թուրքական հակամարտությունները։ Այս մասին հունվարի 11-ին կայացած քննարկման ժամանակ հայտարարեց քաղաքագետ Սուրեն Սարգսյանը։
Նա հավելեց, որ ԱՄՆ-ի ծրագրով նվազագույնը Հարավային Կովկասում Ռուսաստանի ազդեցությունը թուլացնելն է, առավելագույնը՝ Մոսկվային տարածաշրջանից դուրս մղելը։ «Արեւմուտքում նաեւ տեսնում են, որ ներկայիս իշխանությունները պատրաստ են միակողմանի զիջումների գնալ, ինչը չկար նախկին իշխանությունների ժամանակ»,- նշեց փորձագետը։
Նրա գնահատմամբ՝ Արեւմուտքը տեսնում է, որ այսօր լավ հնարավորություններ կան այդ ծրագրերի իրականացման համար. Հայաստանի արտաքին քաղաքական օրակարգում այլեւս չկա Հայոց ցեղասպանության միջազգային ճանաչման հարցը, շատ երկրներում Հայաստանի դեսպանները չեն մասնակցում այս խնդրին նվիրված միջոցառումների, որոնց նրանց հրավիրվում են։
«ԱՄՆ-ի համար միեւնույն էր, թե ինչպես կլուծվի Ղարաբաղի հարցը։ Կարեւորը, որ լուծում լինի եւ Ռուսաստանի ազդեցությունը թուլանա։ Տարածաշրջանը հարեւան է նաեւ Իրանին եւ Թուրքիային, որի գլխավորրությամբ, Ռուսաստանի դուրս գալու դեպքում, Արեւմուտքը կգա տարածաշրջան։ Այս տրամաբանության մեջ է տեղավորվում հայ-թուրքական հարաբերությունների կարգավորումը։ Միաժամանակ Ռուսաստանը հայտնվել է ծանր իրավիճակում՝ հատկապես պատժամիջոցների առումով»,- ընդգծեց Սարգսյանը։