Հայաստանի Հանրապետությունն իր ինքնիշխան տարածքից չի կարող երկրորդ, երրորդ, չորրորդ երկրի որևէ արտապետական ճանապարհի տարածք տալ։ Այս մասին այսօր՝ հունվարի 12-ին, լրագրողների հետ զրույցում ասաց ՀՀ ԱԺ նախագահ Ալեն Սիմոնյանը` անդրադառնալով Ադրբեջանի նախագահ Իլհամ Ալիևի հայտարարությանը։
Ալիեւը մի քանի օր առաջ տեղի ունեցած ասուլիսի ընթացքում ասել էր` եթե Հայաստանը չցանկանա սահմանազատում իրականացնել, ապա սահմանը կանցնի այնտեղով, որտեղով Ադրբեջանը հարկ կհամարի։
«Թող գան անցնեն այնպես, ինչպես անցնում են մնացած քաղաքացիները։ Միգուցե հաշվի առնելով այս պատերազմական իրավիճակը, պատմությունը, կարող է մենք պատվիրակենք որևէ երրորդ երկրի, որպեսզի իրենք անեն անձնագրային ստուգում կամ հաշվառումը։ Բայց դրանք տեխնիկական հարցեր են։ Եթե կա խաղաղության ցանկություն, ապա Հայաստանը պատրաստ է խաղաղության, և դրա մասին բազմիցս ասել է»,– նշեց Սիմոնյանը։
