Ղրղըզստանի էներգետիկայի ոլորտի մասնագետները նախազգուշացրել են երկրում անոմալ ցուրտ եղանակի պատճառով էլեկտրաէներգիայի մատակարարման հնարավոր խափանումների մասին եւ կոչ են անում քաղաքացիներին խնայել էլեկտրաէներգիան, հաղորդում է «Интерфакс»-ը։
«Էլեկտրաէներգիայի սպառման կտրուկ աճի պատճառով էլեկտրացանցերն ու սարքավորումները ծանրաբեռնվում են, հատկապես պիկ ժամերին։ Այդ կապակցությամբ սարքավորումները գերտաքացումից պահպանելու եւ դրանց շարքից դուրս գալը կանխելու համար հնարավոր են էլեկտրաէներգիայի մատակարարման կարճատեւ խափանումներ»,-ասվում է Ղրղըզստանի ազգային էլցանցեր ԲԲԸ-ի հաղորդագրության մեջ:
Ղրղըզստանում ձյան առատ տեղումները սկսվել են հունվարի 10-ին եւ շարունակվել մինչեւ հունվարի 12-ը։ Ուրբաթ գիշերը Ղրղըզստանի հարթավայրային շրջաններում գրանցվել է ջերմաստիճանի նվազում մինչեւ մինուս 24 աստիճան, հանրապետության որոշ լեռնային շրջաններում ջերմաստիճանը հասել է մինուս 42 աստիճան սառնամանիքի։ Ղրղըզստանի օդերեւութաբանների տվյալներով՝ սառնամանիքները կպահպանվեն մինչեւ ամսվա վերջ։
