Բելառուսում այս տարի Հավաքական անվտանգության պայմանագրի կազմակերպության երեք զորավարժություններ կանցկացվեն։ Այս մասին СТВ հեռուստաալիքի եթերում հայտարարել է Անվտանգության խորհրդի պետքարտուղարի առաջին տեղակալ Պավել Մուրավեյկոն, փոխանցում է ԲԵԼՏԱ-ն։
«Այս տարի մենք պատիվ ունենք ղեկավարել կազմակերպությունը եւ նախագահել այնտեղ։ Սա նշանակալի իրադարձություն է՝ հաշվի առնելով, որ նախագահությունն անցկացվելու է «Համերաշխությունից եւ համագործակցությունից դեպի խաղաղություն եւ անվտանգություն» կարգախոսով։ Եվ հաշվի առնելով այն հանգամանքը, որ 2023 թվականը Նախագահի կողմից հայտարարվել է Խաղաղության եւ Արարման տարի, սա հստակ ուղի է սահմանում մեր ներքին եւ արտաքին քաղաքականության համար։ Ուստի սա մեզ համար կարեւոր որոշում է եւ կազմակերպությունում մեր երկրին վերապահված կարեւոր դերակատարում,- ասել է Պավել Մուրավեյկոն,- Մենք մեզ համար մի շարք առաջնահերթություններ ենք սահմանել։ Մասնավորապես, առաջնահերթությունների թվում են խաղաղության եւ հանգստության պահպանումը, տարբեր ճգնաժամային իրավիճակների տեղայնացումը եւ կազմակերպության պատասխանատվության գոտում իրավիճակի ապակայունացման կանխումը։ Երկրորդ կարեւոր առաջնահերթությունը կազմակերպության հավաքական ուժերի զարգացումն է։ Սա կարեւոր խնդիր է, այսօր կազմակերպությունն ունի որոշակի ռազմական ներուժ, որը պետք է զարգացնել, կատարելագործել, համատեղ գործունեություն ծավալել»։
Մյուս ուղղությունը կազմակերպության հեղինակության, այլ միջազգային կազմակերպությունների եւ երրորդ երկրների հետ փոխգործակցության բարձրացումն է, ասել է Բելառուսի Անվտանգության խորհրդի պետքարտուղարի առաջին տեղակալը։ «Այս ամենն արվում է կայունություն ապահովելու եւ առաջացող եւ առկա ռիսկերն ու մարտահրավերները կանխելու համար։ Օբյեկտիվորեն կասեմ, որ նման ոլորտները որպես առաջնահերթություն ընտրելով, որոշակի ընդգծումներ են արվել։ Մասնավորապես, նախատեսվում է Մինսկում անցկացնել Եվրասիական անվտանգության վերաբերյալ միջազգային համաժողով, բավական լայն երկխոսություն ծավալել արտգործնախարարների, պաշտպանության նախարարների, ԱԽ քարտուղարների մակարդակով ՀԱՊԿ-Չինաստան գծով,- հավելել է նա,- Ռազմական կողմից. չորս վարժանքներից, որոնք կազմակերպությունն անցկացնում է տարեկան, երեքը նախատեսվում է անցկացնել մեր երկրի տարածքում։ Դրանք են՝ օպերատիվ արձագանքման հավաքական ուժերի «Փոխազդեցությունը», հետախուզական ստորաբաժանումների «Որոնում» եւ թիկունքի «Էշելոն» զորավարժությունները։ Այս ամենը տեղի կունենա մեր երկրի տարածքում սեպտեմբերին։ Մեծ շրջադարձ կլինի տեղեկատվական եւ վերլուծական բաղադրիչի զարգացումը, քանի որ ով տիրապետում է տեղեկատվությանը, նա տիրապետում է աշխարհին։ Շեշտը դրվել է սրա վրա, եւ սա նույնպես մեր նախագահության առաջնահերթություններից է»,- ասել է նա։
