Եթե առաջնորդվենք Նիկոլ Փաշինյանի մոտեցմամբ, որ Հայաստանում ՀԱՊԿ զորավարժություններ անելն ինքնին վտնգավոր է Հայաստանի համար, ապա Հայաստանի զինված ուժերը եւս որեւէ զորավարժություն, մարտունակության բարձրացման որեւէ միջոցառում չպետք է իրականացնեն: Այս մասին, այսօր՝ հունվարի 16-ին, ԱԺ-ում լրագրողների հետ զրույցում նշեց «Պատիվ ունեմ» խմբակցության պատգամավոր Տիգրան Աբրահամյանը:
«Առհասարակ, զորավարժությունների անցկացումը առաջին հերթին ուղղված է ԶՈՒ մարտունակության բարձրացմանը: ՀԱՊԿ-ի ֆորմատում այն ուղղված է ոչ միայն մարտունակության բարձրացմանը, այլեւ զորքերի գործողությունների ներդաշնակեցմանը: Երկրորդ, ՀԱՊԿ զորավարժությունները այս տարի Հայաստանում անցկացնելու որոշումը ունեցել քաղաքական հիմք: Դա ես որոշակի սատարման քայլ եմ դիտարկում: ՀՀ իշխանությունների որոշումն ինձ համար մեծ առումով ընկակելի չէ եւ չեմ տեսնում դրա Հայաստանի համար բարենպաստ հետեւանքները»,-ասաց Աբրահամյանը:
Դիտարկմանը, թե որպես զորավարժությունններից հրաժարվելու պատճառ նշվում է, որ Ադրբեջանն ու Թուրքիան կարող են հարձակվել, իսկ ՀԱՊԿ-ը հետ չի գալու մեզ պաշտպանելու, ընդդիմադիր պատգամավորն արձագանքեց. «Առանց այդ էլ Ադրբեջանն ու Թուրքիան բավականին ինտենսիվ զորավարժություններ են անցկացվում: Հայտարարվել է, որ մինչեւ 2025 թվականը այդ երկրների զինված ուժերն ունենալու են ներդաշնակեցում եւ ինտեգրում, լինելու է միասնական կառավարում, ինչն ինքնին մեծ սպառնալիք է Հայաստանի համար: Հայաստանը պետք է օգտվի նաեւ դաշնակիցների, բնարավոր բարեկամ երկրների շրջանակից: Այ կամ այն զորավարժությունից հրաժարվելու քայլը որեւէ ձեւով չի նվազեցնում ադրբեջանական հնարավոր հարձակման հավանականությունը: Եթե Ադրբեջանը նման նպատակ ունենա, նա առիթը կգտնի»:
