«Արմենիա միջազգային օդանավակայաններ» ընկերությունը ներկայացրել է «Զվարթնոց» միջազգային օդանավակայանի ընդլայնման հնգամյա ներդրումային ծրագիր։ Հունվարի 16-ին Ազգային ժողովի նիստում՝ «Ավիացիայի մասին» օրենքում լրացումներ կատարելու մասին օրենքի նախագծի քննարկման ժամանակ, այս մասին ասաց Հայաստանի տարածքային կառավարման եւ ենթակառուցվածքների փոխնախարար Արմեն Սիմոնյանը՝ պատասխանելով պատգամավորների հարցերին։
Նրա խոսքով՝ հնգամյա ծրագրի ընդհանուր արժեքը գնահատվում է 350 մլն դոլար։ Հարցը քննարկվել է նաեւ հանրային ներդրումների հանձնաժողովում։ «Կան կոնցեսիոն պայմանագրի հետ կապված որոշակի հարցեր, որոնք պետք է ուսումնասիրվեն։ Դրանից հետո Կառավարությունը լրացուցիչ կտեղեկացնի աշխատանքների ընթացքի մասին»,- հավելեց Սիմոնյանը։
