Երկուշաբթի գործարքների ընթացքում Եվրոպայում գազի բորսայական գները հազար խորանարդ մետրի դիմաց նվազել են մինչեւ 660 դոլար։ 2021 թվականի սեպտեմբերից հետո սա առաջին անգամ է տեղի ունենում, վկայում են Լոնդոնի ICE բորսայի տվյալները։

Եվրոպայի խոշորագույն նիդերլանդական TTF հանգույցի փետրվարյան ֆյուչերսները գործարքների սկզբում հազար խորանարդ մետրի դիմաց 728,6 դոլար էին կազմում: Դրանք ավելացել են 0,2 տոկոսով: Սակայն 11:22-ի տվյալներով գազի ֆյուչերսները կորցրել են 9,2 տոկոս՝ հազար խորանարդ մետրի դիմաց հասնելով 660 դոլարի։

ICE տվյալների համաձայն՝ 2022 թվականին Եվրոպայում գազի միջին բորսայական գինը կազմել է 1260,8 դոլար։  Բնական գազի գները հատկապես բարձր են եղել 2022 թվականի մարտին, այդ ժամանակ, ռուսական էներգակիրների գնման արգելքի մտավախությունների պատճառով, գներն աճել էին մինչեւ 3892 դոլար՝ հազար խորանարդ մետրի դիմաց։

Հետագայում մի քանի անգամ գները նվազել ու աճել են․ մայիսին ֆյուչերսների արժեքը հազար խորանարդ մետրի համար կազմում էր 1000-1100 դոլար, հունիսին՝ 2450 դոլար, իսկ գործարքների ժամանակ՝ մինչեւ 3200 դոլար։ Միայն տարեվերջին հազար խորանարդ մետրի դիմաց ֆյուչերսների գներն իջել են մինչեւ 850 դոլար։