Չինաստանը ողջունում է օտարերկրյա ներդրումները եւ կշարունակի բաց լինել աշխարհի համար։ Այս մասին հայտարարել է փոխվարչապետ Լյու Հեն՝ դիմելով Դավոսի համաշխարհային առաջնորդներին:
«Չինաստանը միշտ բազմակողմանի բաց կլինի եւ կբարձրացնի բացության մակարդակը եւ որակը»,-նշել է նա։ «Օտարերկրյա ներդրումները ողջունվում են Չինաստանում, եւ Չինաստանի դուռը միայն կբացվի»,-ասել է նա։
Իր ելույթում Լյու Հեն նշել է Չինաստանի իշխանությունների ջանքերը՝ լուծելու իրացվելիության ճգնաժամը, որը հետապնդում է անշարժ գույքի ոլորտը 2020 թվականի կեսերից, եւ ասել է, որ երկիրը կշարունակի խրախուսել ձեռներեցությունը եւ աջակցել մասնավոր հատվածին: Նրա խոսքով՝ Պեկինը վստահ է, որ Չինաստանի տնտեսությունը, հավանաբար, կվերադառնա իր բնականոն աճի միտմանը 2023 թվականին, եւ ակնկալվում է ներմուծման, կորպորատիվ ներդրումների եւ սպառման աճ:
Լյու Հեն նշել է, որ աշխարհը պետք է հրաժարվի սառը պատերազմի ժամանակների մտածելակերպից եւ ձգտի ամրապնդել միջազգային համագործակցությունը: