Երեւանում դրական են գնահատում Հայաստանի եւ Թուրքիայի միջեւ օդային բեռնափոխադրումների սահմանափակումների վերացումը։ Այս մասին հունվարի 18-ին Ազգային ժողովի նիստում հայտարարեց Հայաստանի արտգործնախարար Արարատ Միրզոյանը՝ պատասխանելով հայ-թուրքական հարաբերությունների կարգավորման վերաբերյալ պատգամավորների հարցերին։
Նրա խոսքով՝ այսօրվա դրությամբ կան բազմաթիվ այլ հարցեր, որոնց շուրջ բանակցություններ են ընթանում։ «Հուսով ենք, որ առաջիկայում մյուս պայմանավորվածությունները կամ թեմաները իրականություն կդառնան»,-ասաց նա։
Նա անդրադարձավ նաեւ երկու երկրների ներկայացուցիչների հանդիպումներին։ «Բավական երկար ժամանակ է՝ մեր ներկայացուցիչների միջեւ ոչ մի հանդիպում չի անցկացվել։ Այնուամենայնիվ, քննարկումներն ու հանդիպումներն անցկացվել են փորձագիտական մակարդակով։ Սա դրական քայլ է։ Ակնկալում ենք այլ թեմաների իրագործում»,-եզրափակեց Միրզոյանը։