Ադրբեջանում երկար մտորումներից հետո որոշել են Հայաստանից փոխհատուցում պահանջել «շրջակա միջավայրի ոչնչացման համար»։
«2023 թվականի հունվարի 18-ին Ադրբեջանը նախաձեռնել է «Եվրոպայում վայրի կենդանական եւ բուսական աշխարհի եւ բնական միջավայրի պահպանության մասին» առաջին միջպետական արբիտրաժային գործընթացը՝ համաձայն Բեռնի կոնվենցիայի»,-հայտնում են ադրբեջանական լրատվամիջոցները՝ հղում անելով ԱԳՆ-ին։
«Ինչպես նշվում է, այս պատմական արբիտրաժային գործի նպատակն է Հայաստանին պատասխանատվության ենթարկել շուրջ 30 տարի Ադրբեջանի միջազգայնորեն ճանաչված տարածքների ապօրինի օկուպացիայի ընթացքում Ադրբեջանի շրջակա միջավայրի եւ կենսաբազմազանության լայնածավալ ոչնչացման համար: Ադրբեջանը կոչ է անում միջազգային հանրությանը դատապարտել Հայաստանին՝ օկուպացիայի ժամանակ աշխարհի ամենահարուստ եւ կենսաբազմազան էկոհամակարգերից մեկի ոչնչացման համար։ Արբիտրաժային գործընթացի շրջանակներում Ադրբեջանը Հայաստանից պահանջում է վերջ դնել Բեռնի Կոնվենցիայի բոլոր շարունակվող խախտումներին եւ Ադրբեջանին լիարժեք փոխհատուցում վճարել օկուպացիայի տակ գտնվող տարածքների շրջակա միջավայրի ոչնչացման համար»,-նշում են ԶԼՄ-ները։
Հիշեցնենք, որ իբր բնության պահպանության համար պայքարող Ադրբեջանը միայն 2020թ. իր իսկ սանձազերծած ագրեսիվ պատերազմի ժամանակ կիրառել է արգելված զինատեսակներ, այդ թվում ֆոսֆորային զինամթերք, ինչով վնաս է հասցրել ոչ միայն մարդկությանը, այլեւ էկոլոգիային՝ այրելով անտառները եւ աղտոտելով գետերը։