Իրանի խորհրդարանը պատրաստվում է փոփոխություններ մտցնել գործող օրենսդրության մեջ՝ ահաբեկչական կազմակերպություններ ճանաչելով ԵՄ երկրների բանակները։ Այս մասին հայտարարել է Իրանի խորհրդարանի պրեզիդիումի անդամ Ահմադ Նադերին:
«Խորհրդարանում պատրաստվել է «Միացյալ Նահանգների կողմից ԻՀՊԿ-ն ահաբեկչական կազմակերպություն ճանաչելու պատասխան միջոցների մասին» օրենքում փոփոխություններ կատարելու նախագիծ։ Այդ նախագիծը կտարածվի ԵՄ անդամ բոլոր երկրների, ինչպես նաեւ նրանց պատկանող զինված ուժերի, նրանց կազմակերպությունների եւ ինստիտուտների վրա, որոնք ԻՀՊԿ-ն կներառեն ահաբեկչական կազմակերպությունների ցուցակում»,-Նադերիի խոսքը մեջբերում է ISNA գործակալությունը:
Նախօրեին Եվրախորհրդարանը հավանություն է տվել բանաձեւին, որով ԵՄ ղեկավարությանը կոչ է արվում ԻՀՊԿ-ն ներառել ահաբեկչական կազմակերպությունների ցանկում՝ իբր տեղի ունեցող ահաբեկչական գործունեության, ցուցարարների դեմ բռնաճնշումների եւ Ռուսաստանին ԱԹՍ մատակարարելու համար: Ի պատասխան՝ Իրանի ԱԳ նախարար Հոսեյն Ամիր Աբդոլլահիանը եվրոպական դիվանագիտության ղեկավար Ժոզեպ Բորելի հետ հեռախոսազրույցի ընթացքում Եվրախորհրդարանի այդ մտադրությունն անվանել է «Եվրոպայի կրակոց իր ոտքին»: Նա Եվրոպային կոչ է արել մտածել իր իմպուլսիվ մտադրության բացասական հետեւանքների մասին եւ անցնել Իրանի հետ կառուցողական փոխգործակցության: