Ռուսաստանի նախագահ Վլադիմիր Պուտինն Անվտանգության խորհրդի նիստ է անցկացրել։ Նիստի ընթացքում քննարկվել են Ուկրաինայում ռազմական գործողության ընթացքը, ինչպես նաեւ սոցիալ-տնտեսական օրակարգի հարցեր, հաղորդում է Կրեմլի մամուլի ծառայությունը։ Նիստի այլ մանրամասներ չեն հաղորդվում։
«Տեղի է ունեցել մտքերի փոխանակում հատուկ ռազմական գործողության ընթացքի վերաբերյալ։ Պաշտպանության նախարար Սերգեյ Շոյգուն խորհրդակցության մասնակիցներին տեղեկացրել է շաբաթվա սկզբին ռազմական գործողության շտաբ այցելելու մասին»,-ասվում է հաղորդագրության մեջ: Նշվում է, որ Վլադիմիր Պուտինն ԱԽ անդամներին պատմել է վերջին միջազգային բանակցությունների մասին։
Այսօր՝ հունվարի 20-ին, Կրեմլում հայտնել են Վլադիմիր Պուտինի եւ Ղազախստանի նախագահ Կասիմ-Ժոմարտ Տոկաեւի հեռախոսազրույցի մասին։ Նախագահները քննարկել են երկու երկրների միջեւ գործընկերության զարգացումը, այդ թվում՝ փոխգործակցությունը էներգետիկայի ոլորտում։ Նաեւ այս շաբաթ՝ հունվարի 16-ին, Պուտինը հեռախոսազրույց է ունեցել Թուրքիայի նախագահ Ռեջեփ Էրդողանի հետ։ Զրույցի ընթացքում նրանք քննարկել են Ռուսաստանի եւ Ուկրաինայի միջեւ գերիների փոխանակումը եւ Թուրքիայում գազային հանգույցի ստեղծումը։